Shillong, Lber 08
U MLA ka BJP na South-Shillong, Bah Sanbor Shullai ha ka Sngi Thohdieng u la kren shai ba kam myntoi ban phah ïa kiwei-kiwei ki seng saiñ pyrthei sha Lok Sabha naba u Narendra Modi un sa thaw biang ïa ka Sorkar ha kane ka kynti.
“Phi ïohi hi ïa ka jinglong-jingman bad ha ki lad pathai khubor ba u Modi un sa wan biang bad thaw Sorkar. Kumta, kam myntoi ban phah ïa kiwei-kiwei ki seng…kan shu long ka jingpynlehnoh-ei kai ïa ka por,” la ong u Bah Shullai haba kren sha ki lad pathai khubor ha shlem treikam ka seng.
Ha kajuh ka por, une u nongmihkhmat u la kyrpad ïa ki paid nongshong shnong ka Ri-lum Khasi-Jaiñtia ban jied ïa u/ka kyrtong ka BJP khnang ban ïoh bat ïa ka kyrdan Myntri bad ban wanrah shuh-shuh ïa ki kam pynroi bad ki lad ai kam ai jam sha ka Jylla.
“Kiba bun ki skhim ki la wan lyngba ka Sorkar Pdeng ban wanrah ïa ka roi ka par sha ka Jylla..kumta kane ka khubor kan sa leit sha ki paidbah Khasi, Jaiñtia bad Garo ba ka por ka la wan, bad kim dei ban sngap ïa ki nia politik ba ïalam bakla jong kiwei pat ki seng saiñ pyrthei ha kane ka ilekshon, hynrei ban kyrshan ïa ka BJP,” u la ong da kaba bynrap ba kane kam dei ka ilekshon MDC ne MLA, hynrei ka ilekshon sha ka Lok Sabha.
Halor ka jingwan pynïasoh u MLA barim ka TMC, u Winnerson D. Sangma sha ka seng, u Bah Shullai u la pynkynmaw ba u Sangma u dei u paralok uba ïajan bha bad u hapoh ïingdorbar bad ka seng hapoh ka jingïalam u Rikman G. Momin ka dap da ka jingsngewkmen ba utei u MLA barim na Salmanpara u la wan ban pynïasoh sha ka BJP namar ka jingïohi jngai jong u ïa ki kam ba bha jong u Myntri Rangbahduh ka ri, u Narendra Modi bad ka BJP, ha man la ki bynta jong ka ri bad wat ha Meghalaya kumjuh.
