Jowai, Lber 08
Ka jingleit pynrung kyrteng jong ki briew napoh Ri-lum Jaiñtia ïa ki kali thymmai sha nongbah Shillong ha jaka ka distrik lajong ka la ktah ïa ka jingïoh lum khajna jong ka JHADC lyngba ki kali.
Ïa kane la pynpaw da u Chief Executive Member (CEM) ka Jaiñtia Hills Autonomous District Council (JHADC), u Bah Thombor Shiwat ha ka jingïatai kyllum ne General Discussion ïa ka mang tyngka ha ka 8 tarik Lber.
U CEM u la ong ba ka JHADC ka la shu ïoh ïa ka bhah ha kaba ïadei bad ka jinglum khajna tang lyngba ki mar poh khyndew kiba kongsan, ki khajna na ki kali bad ki mar poh khyndew ba rit ba ria na ka Sorkar Jylla.
Nalorkata, u la bynrap ba na ka liang ka Sorkar kam ju ai jingtip sha ka JHADC ha kaba ïadei bad ka jingïohlum khajna kaba tikna na ki mar poh khyndew kiba kongsan, kiba kham rit bad lyngba ki khajna na ki kali.
U la ong, ka Sorkar ka la pynlong ïa ki jingïalang bad baroh ki lai tylli ki Autonomous District Councils (ADC) ka Jylla ha ka nongbah Shillong na ka bynta ban ïamir jingmut ha kaba ïadei bad ka ‘Building Bye Laws’, bad na ka liang ka Sorkar ka la mynjur ban pynmih ïa ka jingpynbna ka ban aibor ïa ka ADC ba kin pyntreikam ïa kane ka aiñ shna ïing ha ki jaka kiba shabar ka jingkhmih jong ka Municipal Board.
U CEM u la ong ruh ba kawei na ki jingshim rai ba la shim da ka Executive Committee na ka bynta ban kyntiew ïa ka jingïoh lum khajna ka long halor ka jingdonkam ban ïoh ïa ka ‘No Objection Certificate’ na ka JHADC na ka bynta ban shna ïa ki jaka shangkai, ïing basa, ki jaka sah kai pyngngad bad kiwei-kiwei.
U la ong ruh ba ka JHADC kan kyntiew ruh ïa ka dor ai wai jaka bad ka donkam ruh ban pynthymmai na kaei kaba la dep pynbeit ha kine ki lai bad sawphew snem kiba la leit noh.
Ha kaba ïadei bad ka jinglait tuh jong ka khajna na ki kam khaïi dewïong be-aiñ kumba la kdew da u MDC ka Central Jowai, u Bah A. Andrew Shullai, u CEM u la ong ba kin pyrshang ban wad ïa ki lad ki lynti ban khanglad ïa kane ka jinglait tuh khnang ba kan long ka jingmyntoi ïa ka JHADC.
Ha ka jingkren pynkut, u Shiwat u la ong, “Kam don jingmut tang ban bat ïa katto-katne ki kam kiba halor lada phim don ïa ka jingkitkhlieh bad ban trei hok ïa la ka jong ka kam. Nga kyntu ïa baroh ki ophisar khamtam ka tnad khlaw, Taxation, Revenue ba kin shim ïa ka jingkitkhlieh, ban trei minot bad don ïa ka mynsiem ïatreilang na ka bynta ban lah ban kyntiew ïa ka jingïoh lum khajna.”
