Ha kine ki sngi, ka jingïalap ilekshon MP Lok Sabha ka la nang syaid. Kawei na ki mat ba la ïakren ha kane ka jingïalap ka dei halor ka ktien Hindi watla ka jingïakhun ka long ban ïoh jingithuh ka ktien Khasi khnang ba kan rung ha ka Khyrnit Ba Phra jong ka Riti Synshar ka Ri India. Haba ai jingkren ha ka jingïalang jong ka National People’s Youth Front (NPYF), ka seng ki samla ka National People’s Party (NPP), u President kane ka seng ha Meghalaya, u Bah Prestone Tynsong u la ther ïa ka seng Voice of the People Party (VPP) ha kaba u la ong ba ka jingpyrshah ïa ka ktien Hindi kan long shisha ka jingsepei lada jied ïa ka VPP namar ha Parliament ki kren da ka Hindi bad u kyrtong jong ka un nym shong Dorbar baroh san snem. Hynrei u Bah Prestone u la kam ba ki ar ngut ki kyrtong ka NPP, ka Kong Ampareen Lyngdoh bad ka Agatha K Sangma ki dei kiba nang bha ban kren Hindi tiak-tiak kum u Myntri Rangbahduh ka Ri, u Narendra Modi.
Haba ther ïa ka VPP halor ka jingpyrshah kren Hindi, utei u Symbud Myntri Rangbah ka jylla u la pynkynmaw ïa ka jingkren jong uwei u rangbah ba lada phah ïa u kyrtong ka VPP sha Parliament kan long tang ka jingsepei namar un phet jyndat na Parliament ba kren Hindi bad un ym shong Dorbar baroh san snem namarba u pyrshah ban kren Hindi na ka daw ba ha Parliament ki ïakren lut da ka Hindi. Nalorkata, u la ong ba lada mih jyndat na Dorbar, kan shu long sepei lut, bad namarkata u la kyntu ïa ki paidbah ba kim dei ban shah pynbiej. U la ong ba ki samla ka NPYF kim dei ban tieng ïa ki jingshah kynthoh khlem nongrim khamtam lei-lei ka VPP bad mynta la kham kynjah ka jingkynnoh jong kane ka seng namarba la sdang pyni nia lang. U Bah Prestone u la ong ba ha dukan sha ne ha surok dei ban kawang beit la ki nia namar na ka VPP kiba ju kren ki don tang lai ngut ne saw ngut hynrei ka NPP ki don da ki hajar ngut kiba nang bad don sap ban kren bad pyni nia bad kham pnah ruh ban ïa ki namar ma ki ki shu hylla khlem don jingmut eiei. U la kyntu ïa ki paidbah ka Ri-lum Khasi bad Jaiñtia ba kin ym shah pynbiej ha ka VPP namar ki shu hylla khlem don jingmut.
Kane ka jingkren bad jingkynthoh jong u Bah Prestone ïa ka VPP ka pyni ba ka NPP lehse ka kham sngewdon jingtieng ïa kane ka seng ban ïa kiwei pat kiba don ha kane ka lympung ilekshon MP. Ka dei ruh ka jingshisha ba na baroh ki seng kiba don ha ka liang pyrshah, ka VPP ka kham mih shakhmat ban kynthoh bad kynthah ïa ka sorkar ba la lamkhmat da ka NPP halor kiba bun ki mat ki jura. Hapoh ka Ïingdorbar Thawaiñ, bun ki ïohi bad ïohsngew ïa ka jingïashim bynta jong ki MLA ka VPP. Nalorkata, ki MLA ka VPP ki la mih surok kum ka jingdawa ban pynkylla ïa ka bhah thung kam thung jam bad ka jingpyrshah ba la weng kam ïa ki ophisar ka Meghalaya Lokayukta kiba ïadei bad ka jingtohkit halor ki kam bamsap bamngem.
Ha kaba ïadei bad ka ktien Hindi, naduh u snem ba la lah, ki MLA ka VPP ki la pyrshah ïa ka jingpyndonkam da kane ka ktien da u Lat ka jylla hapoh ka Ïingdorbar Thawaiñ. Kum ka dak jong ka jingpyrshah, ha ka Dorbar banyngkong jong u snem ba la lah, ki MLA ka VPP ki la mih na Dorbar. Ha kane ka Dorbar Mang Tyngka kaba dang shu dep, ka VPP ka la maham lypa ba u Lat u dei ban kren da ka ktien English lane ka shlem treikam jong ka Assembly ka dei ban buh da ki kor ki bor kiba lah ban pynkylla hangto-hangto ïa ka ktien na ka Hindi sha ka English khnang ban ïa sngewthuh. Ka la don kata ka jingpynkylla ktien kaba la ïohsngew tang da ki MLA kiba shong Dorbar. Ka VPP ka sngew ba da jingpyndonkam ïa ka ktien Hindi ha Ïingdorbar Thawaiñ ka long kum ka jingpyrshang ban pyntreikam da kane ka ktien salonsar watla kam dei satia ka ktien jong ka Ri baroh kawei.
Nangne shakhmat, ka jingïather nia hapdeng ka NPP bad ka VPP kan nang kham jur halor ki mat kiba bun bad ym tang halor ka ktien Hindi. Hynrei, hapdeng kane ka jingïatai shaphang ka ktien Hindi, ngi kyrmen ruh ba kine ki seng lem bad kiwei pat kin buh ïa ka mat kaba ïadei bad ka jingpynrung ïa ka ktien Khasi ha ka Khyrnit Ba Phra jong ka Riti Synshar kumba la rai lang da ka Ïingdorbar Thawaiñ ka jylla. Ha kajuh ka por, dei ban ïakren ruh halor kiwei pat ki mat ki jura kiba kum ki seng bad ki MP kin ïakhun hangthie ha Parliament bad ba kin long shisha kum ki stieh ban ïada ïa ki nongshong shnong na ka jingshah thombor ha ki aiñ ki kanun jong ka Parliament bad ka Sorkar Pdeng.
