New Delhi, Lber:
Ka Central Bureau of Investigation (CBI) ka la pynlong ïa ka jingleit khynra sha 67 tylli ki jaka kiba don ha ki 7 tylli ki jaka sor jong ka Rajasthan bad Maharashtra ha kaba ïadei bad ka bamsap kaba la kot sha ka `820 klur kaba la mih lyngba ka IMPS ha UCO Bank, la ïathuh ki heh ka kynhun tohkit. Kane ka jingjia ka ïadei bad palat 8,53,049 tylli ki IMPS (Immediate Payment System) ha ki rukom wan bad rukom leit jong ka pisa kaba la long hapdeng ka 10 tarik, Naiwieng bad 13 tarik, Naiwieng mynshem snem ha kane ka Bank.
“Ka IMPS kaba wan ka la long na kumba 14,600 tylli ki Account jong ki 7 tylli ki Bank jong ki riewshimet ha kaba la pynrung da ka lynti kaba beaiñ ha ki Account jong palat 41,000 tylli ki Account kiba ha UCO Bank. Ïa kane ka `820 klur la phah sha ki Account jong ka UCO Bank khlem da sei ïa ka pisa na ki Bank ba kine ki Account ki don,” la ong u nongaiktien jong ka CBI.
Ka jingpynlong ïa ka jingleit khynra ha Rajasthan bad Maharashtra ha ka Sngi Balang ka la long halor ka jingthmu ban khmih bniah ïa ki briew kiba la ïoh ïa ka pisa bad kiba sei ha ka jaka ban pynphai ïa ka sha ka Bank, la ïathuh ki heh ka CBI. Kane ka sien ba mynta ka dei ka jingleit khynra ha ka sien ka ba-ar.
