Shillong, Lber 08
Ka Federation of Khasi Jaiñtia & Garo People (FKJGP) ka la pynpaw ka jingbitar ïa ka North East Sunshine Trust (India) halor ka dorkhas ba ka la phah sha ka Sorkar India halor ka jingkyntu ban pynim biang ïa ka jingtih Uranium hapoh ka jylla Meghalaya.
Ka FKJGP ka la maham ïa ka Sorkar Jylla ba kam dei ban ailad ïa kum kine ki seng ba kin thaw jingkulmar hapoh ka Jylla ban tih ïa une u mar poh khyndew.
U General Secretary ka FKJGP, Bah Eldie N Lyngdoh, u la ong ba ka kam tih Uranium ha Meghalaya ka dei ka kam kaba la pynkut naduh mynno namar ka jingpyrshah jur jong ki paidbah ba bun.
Namar kata, u la maham ïa kane ka NEST ba kam dei ban mushlia bad pynim biang ïa kane ka kam lym kumta ka FKJGP kam banse ban tuklar bad leh ïa kaba dei ban leh halor kane.
“Ka FKJGP bad kumjuh ruh kiwei ki seng, kin ym ailad satia ïa ka jingtih Uranium ha Meghalaya. Long kat kaba long, kane ka dei ka kam ïap kam im jong ka Jaidbynriew”, la ong u Bah Eldie.
