Shillong, Lber 08
Hadien ka jingïai ap khmih lynti la bun bnai ban sdang noh ïa ka Shillong Premier League na ka bynta ka aïom ïalehkai 2023, ka Shillong Sports Association (SSA) kan shim ïa ka rai mynta ka sngi Saitjaiñ na ka bynta kane ka lympung ïalehkai kaba dangsah teng.
Kane kan dei ka sien ba ar kaba ka Tournament Committee jong kane ka synjuk kan shong jingïalang biang bad ki nongmihkhmat jong phra tylli ki klob ki ban ïashim bynta ha kane ka lympung hadien ba ki la dep ban ai jingtip sha la ki jong ki nongïalam jong kitei ki klob.
Kine phra tylli ki klob ki ban ïashim bynta ha ka SPL 2023 ki long ka Mawlai SC kaba long ka lahduh jong ka aïom ba la dep, kumjuh ka lahduh jong ka Meghalaya State League ka Rangdajied United FC, ka Shillong Lajong FC, Langsning FC, Ryntih FC, Nangkiew Irat SC ryngkat ka Nongthymmai S&CC bad ka Sawmer SC ki la kiew kyrdan na ka First Division jong u snem 2022.
Kumba ka paw ki paidbah ki la kwah dik dik ban ïohi noh ïa kane ka lympung kaba dang sahteng hadien ba ka SSA ka la ïoh ïa madan ïalehkai ba paka ha SSA Stadium, Polo bad kaba la siang da u phlang plastik.
Ki lympung kiba katei ka synjuk la la lah ban pyndep na ka bynta ka samoi ïalehkai jong u snem 2023 ki kynthup ïa ka Fourth Division, Third Division, Second Division, First Division bad la bynrap lang ruh sa ka lympung ïalehkai jong ki kynthei (Women’s Football League), ka U-10 bad ka U-14 bad kumjuh ka U-16.
Kumba ka paw mynta u snem ka SSA kan hap ban pynlong haduh ar sien ïa ka SPL; kata ka aïom ïalehkai 2023 bad ka aïom ïalehkai 2024. Kumta ka SSA kam don por shuh ban dang pynslem namar hadien ban sdang ka aïom ïalehkai 2024, kan hap ban pynlong shwa ïa ka Inter Club Transfer.
Namar kata, la sngewthuh ba ka SSA kan hap ban pynlyngkot ïa ka SPL 2023, hynrei ka jingkylli kaba mih ka long da ka jait league kaba kumno kan pynlong? Kumba ju long man la ka aïom ki don haduh ar tylli ki wat jingïakhun (double-leg) kaba mut ba haduh kaba kut artad jong ka lympung ban rai mano ban ïoh rah ïa ka nam lahduh ha ka SPL.
Kat kum ka jingsngewthuh na ka jingïalang kaba nyngkong kaba la long ha ka 5 tarik mynta u bnai hapdeng ka SSA bad ki 8 tylli ki klob, ka jingeh kaba wan mih paw mynta ka kynti ka dei na kiwei pat ki daw, katta ka long na ka liang ka kompeni kaba la kular ban bei tyngka (sponsor) ïa kane ka lympung, namar ka jingkheiñ jingdiah kut snem (financial year) jong ki lehse kan nym ïahap satia ïa ka SSA ba kan sdang ban ïaid beit noh shakhmat ban pynlong ïa kane ka lympung.
Lada ka SSA kan ym la ban pynlong ïa ka aïom ïalehkai 2023, kan buh jingeh ïa ki saw tylli ki klob ki ban ïoh rung sha ka Meghalaya State League (MSL) ban pynlong da ka Meghalaya Football Association mynta u snem. Lah ban kdew ba lyngba ka MSL kan plie lad pat ïa kawei na ki kynhun ka ban khur ïa ka nam lahduh ba kan ïoh ïashim bynta ha ka Third Division League ban pynlong da ka All India Football Federation (AIFF).
