Shillong, Lber 08
Ka Goa bad ka Services kin pynkhreh ban ïaknieh ïa ka nam lahduh ha ka lympung ïalehkai 77th National Football Championship na ka bynta ka Santosh Trophy ha ka Sngi Saitjaiñ ha Golden Jubilee Stadium kaba ha Arunachal Pradesh.
Haba pha sha ki jing-ïakhun semi final, ka Goa ka la lah ban pynliem ïa ka Manipur da 2-1 kol, katba ka Services ïa ka Mizoram da 2-1 kol.
Kane nam jop jong ka Goa ka la wan urlong lyngba u Necio Maristo Fernandes ha ka extra time.
Haba phai sha kane ka jingïakhun semi final kaba baroh ar kynhun ki la ïakhun tyngeh, hynrei ka Manipur ka la ïoh ban pynkhih jar nyngkong eh lyngba u Ngangbam Pacha Singh ha ka minit kaba 18. Kane ka shi kol ka la ïai neh haduh kaba kut jong ka kylla step.
Hadien ba la bteng ïa ka jingïakhun jong ka kylla miet kine ki kynhun ki la ïai bteng ban ïakhun tyngeh bad khamtam ka Goa kaba dang donkam pynphai. Hapdeng kane ka jingïakhun, ka Goa ka la lah ban phai kylla hashwa ba wai lyngba u Necio Maristo Fernandes ha ka minit kaba 90+6 na ka bynta ban ïakhaid mar shi kol.
Hadien ba la bteng ïa ka jingïakhun jong ka extra time baroh ar ki kynhun ki la sei bor bah ban ïakhun tyngeh, hynrei u Fernandes u la lah ban pynurlong biang sa shi kol ha ka minit kaba 116 na ka bynta ban khur syndon ïa ka jingjop.
