Shillong, Lber:
Namar ka jingpyrshah jong kawei ka kynhun seng napoh ka jylla ban ai sanad long Rangbah Shnong sha ki jaitbynriew Garo kiba la shong la sah naduh kulong-kumah hapoh ki 54 tylli ki shnong kiba hap hapoh ka Raid Marwet jong ka Hima Mylliem, na ka liang ka All Ri-Bhoi Garo Headman Association (ARBGHA) ha ka Sngi Palei ka 7 tarik u Lber 2024 ka la leit ban aiti da ka dorkhas ha u Myntri Rangbah ka jylla, u Conrad K. Sangma ban kyrpad bad kyntu ba un tuklar lem halor kane ka jingeh jong ki.
Kane kynhun ka la kyrpad ïa u Myntri Rangbah ba un ïakren lem bad ka Khasi Hills Autonomous District Council (KHADC), ka Hima Mylliem bad ka Raid Marwet na ka bynta ban ai ïa ka Sanad sha u Rangbah Shnong ka shnong uba dei na ka jaitbynriew Garo.
Haba ïoh ban ïakren bad u nongaiktien jong ka ARBGHA, u Nikhil R. Marak, u la ïathuh ba ha ka jingïakren bad u Myntri Rangbah ki la kyrpad ba kum ki nongshong shnong ka jylla bad kum ki jaitbynriew Garo kiba la shong la sah naduh ki por hyndai-hynthai hapoh ka thaiñ Ribhoi, ki don ïa ka hok ban long kum ki Rangbah Shnong ha katei ka thaiñ ba don tang da ki Garo suda. Hynrei ha kine 2 snem pat ka la mih ka jingpyrshah bad ka jingkhanglad ban ai sanad long Rangbah Shnong sha ki jaitbynriew Garo.
“Ngi don hok ban ïoh ïa kane ka kyrdan ban synshar ïa ka shnong lajong, ngi don hok ban ïoh long kum u Rangbah Shnong jong ka shnong jong ngi”, la ong u Nikhil. Na ka liang u Myntri Rangbah u la ong ba un sa wad ki lad ki lynti kumno ban weng ïa kane ka jingeh bad ban ai ïa ka hok jong kitei ki jaitbynriew Garo ba kin ïoh ïa ka lad ban long Rangbah Shnong hapoh ki shnong jong ki. Na ka liang u Myntri Rangbah u la ong ruh ïa ka kynhun ARBGHA ba ka dei ban leit ïakynduh ïa u CEM ka KHADC, u Bah Pynïaid Sing Syiem halor ka jingpan jingpynshai ba hato ki Garo kiba don hapoh ka jylla ki don ne em ïa ka hok ban ïoh ïa ka sanad ban long Rangbah Shnong hapoh ki shnong jong ka Raid Marwet.
Na ka liang ka Serimina Marak pat ka la kyrpad ïa ka ARBGHA ba ka dei ban ïaleh ban wanrah ïa ka shongsuk shongsaiñ hapoh katei ka thaiñ bad ba ki dei ban tip shwa ïa ka jingshisha baroh halor kane ka kam.
“Nga kwah ban kyrpad ïa kane ka sengbhalang ba kin tohkit bha ïa ka jingshisha hashwa ba kin leh kaei-kaei”, la ong ka Serimina.
