Shillong, Lber 08
U MLA barim ka TMC na Salmanpara, u Winnerson D. Sangma ha ka Sngi Thohdieng u la wan shakhmat ban pynïasoh ïalade bad ka Bharatiya Janata Party (BJP) da ka jingthmu ban shakri kham bha ïa ki paidbah lyngba ka rynsan ba khlaiñ bor jong ka seng.
“Ka jingthmu jong nga ban pynïasoh sha ka BJP ka long ha ryngkat ka jingthrang ban shakri lem bad ka jingminot ban aiti ïalade lyngba ka jingshakri sha ki paidbah ha ka rynsan kaba kham bha,” la ong u Sangma haba kren sha ki lad pathai khubor ha shlem treikam ka BJP.
Utei u nongmihkhmat barim u la ïathuh ba u la ïadon bynta ha ki kam saiñ pyrthei naduh u snem 2013 bad u la mihkhmat ïa ka Salmanpara konstitwensi na bynta 10 snem (2013-2023) hynrei um shym la poi sha ka thong ha kane ka ilekshon ba la dep.
Haba pynsngew ba ka rai ban pynïasoh sha ka BJP ka long ban nang pynkhlaiñ shuh-shuh ïa ka seng hapoh ka Jylla, u Sangma u la ong ba un ïai bteng ban shakri hok ïa ki paidbah ym tang jong ka konstitwensi hynrei jong ka Jylla baroh kawei khnang ba u lah ban synñiang na bynta ka jingkiew jong ka ri lyngba kane ka seng.
Haba kylli balei u la ieh noh ïa ka TMC, u la ong, “Nga sngewnguh eh ïa ki nongïalam jong ka TMC – Mamata Banerjee, Abhishek Banerjee bad khamtam jong ka Jylla – Dr. Mukul Sangma uba la ïalam ïa ka Jylla la bun-bun snem. Hynrei ïa mynta, namar ka jinglong-jingman ka saiñ pyrthei hapoh ka Jylla, nga shem ba ka BJP ka la nang kiew bad ki briew ki la sdang ban pdiang ïa ka. Nga la pynïasoh mynta kum u dkhot ka BJP bad bun ki ban dang wan shuh ha kine ki khyndiat sngi ban wan.”
La kin nang don ne em ki nongïalam ka TMC ba kynthup ïa u Dr. Mukul Sangma ki ban wan pynïasoh sha ka seng, u Sangma u la ong, “Ïa kane phin sa ïohi hi ha kine ki khyndiat sngi ban wan. Ka shong ha ka rai u Dr. Mukul haba ïadei bad kane – ban ai jingshakri ïa u paidbah.”
