Shillong, Lber:
U Myntri Rangbah ka Jylla, u Conrad K Sangma, ha ka Sngi Palei u la ïoh ban sam ïa ki shithi thung kam sha 425 ngut ki doktor ba kynthup ïa ki Junior Specialist, Medical Officer bad ki Dental Surgeon kiba la shah thungkam thymmai ban leit shakri sha kylleng ki jaka ai jingsumar hapoh ka Jylla.
Ïa ka jingïalang ban pdiang ïa kane ka jingpynrung kam thymmai ïa kine ki doktor la pynlong hapoh ka State Convention Centre, Shillong ha ryngkat ka jingïadon lang ka Myntri ka tnat ka Koit ka Khiah ka Kong Ampareen Lyngdoh, u Myntri ka tnat PHE u Marcuise N Marak nalor kiwei kiwei.
Haba ai khublei ïa kine ki doktor ba la pynrung kam thymmai, u Myntri Rangbah u la kyntu ba kin trei da ka jingaiti met bad mynsiem bad da ka jingthmu ban shakri ïa ka imlang sahlang.
“Ka eksamin thungkam ba la pynlong da ka Sorkar ka long kaba khuid bad suba. Phi ïadon hangne namar phi dei kiba lah bad tbit bad phi dei kiba kynsai tam bad ba phi la ïaleh bha ha ka eksamin ka jong phi” la ong u Conrad.
Haba kren halor ki jingeh bad ka jingthungkam ha ki tnat sorkar bapher bapher, u Myntri Rangbah u la ong, “Ngi la phiah ïa ka rukom thungkam da kaba pynkha ïa ka Board for Education and Health, kaba la pynsuk lut ïa ka rukom thungkam. Ha ki snem ba la leit ka rukom thungkam ka dei kaba suki bha bad ha ki katto-katne ki khep, ka shimpor ruh haduh hynriew snem. Ka rai ban thaw ïa ka Recruitment Board la ka jong ïa ka tnat Education bad Health ka la pynthikna ba ka rukom thungkam kan sted bha ha kaban pyndap ïa ki kam kiba lait thylli”.
Halor ka jingpynkhlaiñ ïa ki lad ai jingsumar sukher, u Myntri Rangbah u la ong ba haba phai sha ka percentage, ka Sorkar ka la kheiñ kongsan bha ïa ka koit ka khiah bad haduh 8% na ka mang tyngka ka Jylla, la ai sha ka koit ka khiah. “Ka mang tyngka sha ka tnat ka koit ka khiah ka dei kaba heh duh hapoh ka Ri, haba ngi thmu ban pynkhlaiñ bad pynkylla lut nadong-hadong ïa ki kam ba ïadei bad ka koit ka khiah,” u la ong.
U Myntri Rangbah u la pyntip ruh ba ka Sorkar ka la thaw ïa ki Administrative Housing Unit ha kylleng ki jaka jong ka Jylla na ka bynta ki doktor bad kiwei kiwei khnang ba ki jingtei kin don wat sha ki jaka ba kyndong duh jong ka Jylla ka ban pynsuk ïa ki nongtrei Sorkar ba kin trei ïa ki kam khlem ka jingeh.
“Ha ka jaka ban buh Housing Complex la ka jong na ka bynta ki tnat treikam bapher bapher, ka Sorkar ka don jingthmu ban thaw Housing Complex ban ai jaka ïa ki doktor, ki karikor bad kiwei ki nongtrei Sorkar hapoh kawei ka complex,” u la bynrap.
U Conrad u la ong ba nalor ki District Headquarter ki ban sa ïoh ïa ki Administrative Housing Complex, ka Sorkar ka don jingthmu ruh ban shna ïa kum kine ki complex ha ki jaka nongkyndong na ka bynta ki doktor, ki nos bad kiwei ki nongtrei Sorkar. “Ngin ym lah ban leh noh mar mar ha baroh kawei ka Jylla hynrei ka Sorkar kala kut jingmut ban sdang ïa ki jingtei da ka mission mode”.
U la pyntip ruh ba ha kine ki khyndiat snem ban wan, ki PHC bad CHC kynthup ki hospital ha kylleng ki jaka ka Jylla kin sa ïoh noh ïa ka dur bathymmai. “Ka kam ka la sdang bad hapoh kane ka samoi jong ka Sorkar, ngi dei ban lah pyndep bad pynheh ïa baroh ki jingtei jong ki jaka ai jingsumar,” u la ong.
U la ong ruh ba ha kine ki khyndiat taïew ban wan, ka Sorkar kan sa pyllait sa ïa ka Patient Management System hapoh ka Jylla ba kan pynsuk ha ka ban peit thuh ïa ki nongpang kiba leit shah sumar ha ki jaka sumar bapher bapher jong ka Jylla.
