Shillong, Lber 08
U MLA ka BJP na South-Shillong, Bah Sanbor Shullai u la ong ba ka seng kan siang da ka ‘carpet’ saw kum ka dak ban pdiang burom lada u Myntri Rangbah barim ka Jylla, u Dr. Mukul Sangma u wan ban pynïasoh noh sha ka seng.
U Bah Shullai u la ong ïa kane ha ka Sngi Thohdieng haba ai jingkren ha shlem treikam ka seng ha ka jingïalang pdiang sngewbha ïa u MLA barim ka Salmanpara, u Winnerson D. Sangma uba la wan ban pynïasoh ïalade sha ka BJP.
Haba kylli la un pdiang ne em lada u nongïalam ka TMC hapoh ka Jylla, u Dr. Mukul Sangma u wan ban pynïasoh sha ka seng, utei u MLA u la ong, “Ngin pdiang, bad u Dr. Mukul u dei u briew uba la ih bha ha ka kam saiñ pyrthei. Hangne ha shlem treikam ka seng, ngin siang da ka ‘carpet’ saw ban pdiang sngewbha ïa u Dr. Mukul.”
Kumba ka long mynta, ka TMC ha kane ka ilekshon ba la dep sha ka ïingdorbar thawaiñ ka Jylla ka la jop tang 5 ngut ki nongmihkhmat ba kynthup ïa 4 ngut na Ri-lum Garo bad uwei na Ri-lum Khasi.
Ha kawei ka liang, u Myntri ka Sorkar Jylla bad MLA ka seng na Pynthorumkhrah, Bah A.L. Hek haba kren ha katei ka jingïalang u la ong ba ka jingwan pynïasoh jong u Winnerson D. Sangma ka kdew shai ba ka BJP ka la jop lypa ha ka ilekshon ban wan sha ka Lok Sabha.
“Kumba nga la ong, ym tang ma u marwei…kiwei-kiwei ki MLA barim ne ki MLA ba mynta ruh shen kin sa pynïasoh sha ka BJP. Ngi dang ïai ap ïa ka por bad kumba la ong da u Winnerson, ha kine ki khyndiat sngi kin sa wan pynïasoh,” u la ong. Shuh shuh haba kylli la kin dang don shuh ki MLA na TMC ki ban wan pynïasoh, u Bah Hek u la ong, “Shu ap beit bad sa peit.”
