Shillong, Lber 08
Ki kyrteng jong u MP ka Shillong, u Bah Vincent H Pala, lem bad u MLA ka Gambegre, u Saleng A Sangma, ki la paw ha ka thup banyngkong jong 39 ngut ki kyrtong ba ka seng Congress kan pynïakhun ha ka ilekshon Lok Sabha ka ban wan. Ïa kane ka thup la pyllait ha nongbah New Delhi ha ka Sngi Thohdieng.
Nalor jong u Bah Pala, u ban ïakhun biang ïa ka ilekshon MP ha ka sien kaba saw na Shillong Parliamentary Constituency, bad u Saleng, u ban ïakhun ha ka sien banyngkong na Tura Parliamentary Constituency, ka don ruh ka kyrteng jong u Rahul Gandhi u ban ïa aireng biang na ka Wayanad konstitwensi kaba don ha ka jylla Kerala ha ka sien kaba ar. Hynrei kam pat shai la u Rahul un ïakhun lang ne em sa na Amethi konstitwensi ha Uttar Pradesh.
Nalorkata, u Shashi Tharoor un ïakhun na Thiruvananthapuram ha Kerala kaba dei ka konstitwensi kaba u la mihkhmat la lai sien kynthih katba u Myntri Rangbah barim ka Chhattisgarh, u Bhupesh Baghel, un ïakhun na Rajnandgaon ha Chhattisgarh.
Shuh shuh u General Secretary ka seng Congress, u KC Venugopal, un ïakhun na Alappuzha ha Kerala katba u DK Suresh, para jong u Symbud Myntri Rangbah ka Karnataka, u DK Shivakumar, un ïakhun na Bengaluru Rural.
Na ki 39 ngut ki kyrtong, 16 ngut ki dei ban ïakhun na ki konstitwensi kiba don ha Kerala, 6 ngut na Karnataka, 6 ngut na Chhattisgarh bad saw ngut na Telangana. Kiba sah ki dei na Meghalaya, Nagaland, Sikkim, Tripura bad Lakshadweep.
Haba pynbna ïa kitei ki kyrteng, u Venugopal u la ong ba na ki 39 ngut ki kyrtong, 24 ngut ki dei na ki kynhun OBC, Scheduled Caste, Scheduled Tribe bad kiwei pat ki kynhun rit paid.
