Shillong, Lber 07
Hynriew ngut ki nongïalehkai na ka Meghalaya Traditional Wrestling and Pankration Association ki la lah ban pass na ka bynta ban long kum ki ‘License Referee & Judges’ ba pura jong ka All India Traditional Wrestling and Pankration Federation (AITW&PF).
Kane ka la wan hadien ba ki la ïashim bynta ha ka National Referee & Judges Seminar kaba tang saw sngi kaba la sdang naduh 1 tarik haduh 4 tarik mynta u bnai ha Tripura. Ïa kane ka prokram la pynlong da ka All Meghalaya Traditional Wrestling & Pankration Association (AMTW&PA).
Katei ka AITW&PF ba la khlieh da u Omar Tamboli na Pune, Maharashatra kum u President, ka dei kaba la pynïasoh sha ka International Mas-Wrestling Federation (IMWF) & International Federations bad ka United World Wrestling (UWW). Hapoh kane ka AITWPF ki kynthup ïa ki rukom ïalehkai ïalympat kiba bun jong ki ri bapher bapher ka pyrthei kum ka Alysh (Belt Wrestling) – Qazakh Kuresi – Pankration Athlima – Pankration-Palesmata – Polydamus-Khapsagai-Mas Wrestling.
Ïa kane ka AMTW&PA la khlieh da ka Kong Anita Songthiang kum ka President (kaba la ïohpdiang ïa ka khusnam Kiang Nangbah ha ka Arm Wrestling), Kong Eva Kharmujai kum ka Vice-President, u Nangkitboklang Songthiang kum u General Secretary bad u Shadwinson Kharmaw-phlang kum u Treasurer.
Kat kum ka kyrwoh la ong ba ki la don 6 ngut kiba la pass kum ki ‘License Referee & Judges’, hynrei ym shym la pynpaw ïa ki kyrteng ba pura jong ki.
