Shillong, Lber:
Ka FKJGP Upper Shillong Circle ka la pynpaw ïa ka jingsngewkmen hadien ba ïohi ïa ka surok Four-Lane na Umshyrpi shaduh Hynñiew Mer la sdang ban trei shaid- shaid.
Haba ïakren bad u Bah Kitboklang Nongphlang uba dei u President ka FKJGP Upper Shillong Circle, u la pynpaw ka jingsngewkmen haba ka sorkar ka la phah trei biang ïa ka surok na jingkieng Umshyrpi shaduh Hynñiew Mer.
U la ong ba kane ka jingtrei ka dei ban ïaid beit shakhmat khlem don shuh ka jingsangeh khnang ban pyndep ha ka por kaba biang khnang ba ki paidbah kin ïohi noh ïa kane ka surok (Four-Lane).
U la pynpaw ba haduh mynta ym shym la lah ban tip la kan ktah ne em ïa ka leit ka wan jong ki paidbah namar don ki bynta ba ka kompani ka hap ban pom mar shiteng ïa ka surok hynrei u shaniah ha ka jingstad ka kompani.
Haba ïadei bad ka jingthmu ka sorkar ban aiti da ka jaka jong ka tnad Veterinary ha Hynñiewmer ban shna Petrol Pump kaba don ha Anjalee Pump, u Bah Kitboklang u la ong kumba ka seng ryngkat ka synjuk dorbar shnong ki la pyrshah kin ïaid pyrshah beit.
“Ki lah ban tih ïa ka khyndew hynrei ngim shah ban pynïeng ïa ka petrol pump” u la ong.
Kum ban shu pynkynmaw ba ïa ka surok four-lane la sdang ban trei biang mar shu poi ha u bnai Nohprah bad la bteng mynta ban trei naduh Hynñiew Mer, San Mer, Saw Mer shiteng haduh hakhmat jaka sah ki shipai 101 Area.
