Shillong, Lber:
Ka Khasi Students’ Union (KSU) East Jaiñtia Hills District Unit ha ka 6 tarik u Lber 2024 ka la pan jingshai na u Deputy Commissioner (DC) jong ka East Jaiñtia Hills District uba dei ruh u Shongknor jong ka District AYUSH Society ka district halor ka jingsuba bym pyllait ïa katto-katne tylli ki kam bathylli hapoh ka district.
Ka KSU ha ka kyrwoh khubor ka la ong ba ki ‘post’ kiba ka suba ki bym pat pyllait ki kynthup naduh ki kam Ward Boy, Ward Girl, Sweepers, Cook, Chowkidar, Jamandar, Peon bad kiwei kiwei kiba dei ban pynbna ha ka byrta ba la pynmih da u DMHO ha ka 15 tarik u Rymphang 2024.
Ka seng ka la pan jingshai bad buh jingkylli ba hato ïa kum kine ki ‘post’ yn set noh ne kin sa khot pat da kawei ka byrta? Ka seng ka suba ba ka la don ruh ka shithi na u Commissioner ka tnat koit ka khiah ka sorkar jylla ba la bthah ïa ki DC kiba long ruh ki shongknor jong ka District AYUSH Society ba kin leh ïa kaba donkam ban pynbeit halor ka jingthung kam bad ïa kane ka notification lane circular ym shym la don ha ki paidbah (public domain) ban shai shuh shuh halor katno tylli ki kam ba lait la bthah ban khot.
Ka seng ka la ong ba haba pan jingshai na u DC, u la ong ba un hap ban ïaphylliew jingmut shwa bad u DMHO ka district uba dei ruh u Member Secretary ka Society halor kane bad yn sa shim ka rai.
Kumta na ka liang ka seng kan buddien halor kane ka jingkhot thep kam khnang ba kan long kaba khuid khlem don kano-kano ka jingleh ne ñiew shiliang ha baroh ki kam ba thylli.
