Shillong, Lber 08
Ka sap kaba u Blei u la ai kyrpang ïa u briew haba u wan sha ka sla pyrthei ka la pynlyngngoh ïa baroh ki paidbah kiba poi ha ka tamasa Monolith Festival 2024, namar uwei u rangbah uba sah ha Jowai u la oh-shrong da u dieng ïa ka dur u Jisu bad khatar ngut ki synran bad ka miej ba ki bamja lang.
Une u rangbah uba don ïa ka sap kyrpang u dei ba la tip kyrteng kum u Gilford Pde na ka shnong Chiliangraij, Jowai. Une briew u la wan die bad pyni nam ïa ki tiar ba u la oh-shrong hi da ki dieng ha ki dukan ba la pynbeit kyrpang ha Khasi Heritage Village kaba don hakhmat ka ‘law kyntang Lawphlang.
Ha ka jingïakynduh kyrpang bad U Nongsaiñ Hima ha ka tamasa mawbynna balai sngi, u Bah Pde u la wan lang bad ka khun kynthei ban die ïa ki tiar ba la oh-shrong ïa ka dur u Jisu bad khatar ngut ki synran, nangta la oh-shrong ïa ki briew kiba pyni ïa kiba mynbarim haba ki bah khun, ki kit dieng haba ki wanphai na lyngkha.
Katba ïa ki dur ba la shu wah ki dei kiba la dep oh-shrong bad la dep die lut sha ki briew.
Na kitei baroh ki dur, kaba kham khring palat ïa ka dukan jong u Bah Pde ka dei ka dur u Jisu bad khatar ngut ki synran namar baroh kim lah ban mutdur ban oh-shrong kat haduh ba baroh ki la kwah ban ktah bad shondur.
Ka dor jong kane ka dur ka poi haduh T. 5 lak hynrei la don lypa kiba la dep thied.
Haba ïakren bad u Bah Pde, u la ïathuh ba u la sdang ban oh-shrong ïa ki dieng ka dei ha u snem 1990 hynrei u shu buh kai ha ïing. Dei tad ha u snem 2020 ka sap jong u ka la paw pyrthei hadien ba u la shna ïa ka dur u Jisu bad ki synran haba kiba ïohi ki la shondur bad pynsaphriang ha ki social media.
U la ïathuh haba nyngkong u mut ban shna ban buh tang ha ïing hynrei mynta bun ki briew ki la phah shna ban thied syndon.
U Bah Pde u la pyntip ba u la shna ïa ka dur u Jisu bad ki synran haduh saw bnai namar u trei haduh 12 baje mynmiet.
