Nongstoiñ, Lber:
Ka jingsahteng bad sahkut jong ka jingpyntrei ïa ka surok na Mawïaban-Mawkadiang-Nongkaniang ha West Khasi Hills kaba jngai kumba 2 kilometer eiei ka la wanrah jingeh ïa ki paidbah nongleit nongwan ka thaiñ kiba ju pyndonkam ïa katei ka surok.
Ha kaba ïadei bad kane, ka Federation of Khasi Jaiñtia & Garo People (FKJGP) Mawliehbah Area Unit ha ka Sngi Palei ka la leit ban ujor sha u Executive Engineer (EE) ka tnat PWD (R).
Ki nongïalam ka FKJGP haba kren sha ki lad pathai khubor hadien ba la dep ban ïakynduh ïa u EE ka tnat PWD, ki la pynpaw ba ki don ruh ki bynta jong katei ka surok kiba la lah ban pyndep hynrei ka jingpyntrei ka long kaba torti bad ki don ruh ki bynta ba la shu ieh khongreng.
Shuh shuh ki la ong ruh ba ïa katei ka surok la mang pisa haduh `2 klur ha kaba la mang ban pyndep hapoh u bnai Kyllalyngkot jong u snem 2024 hynrei ki kontraktor kim shym lah satia ban pyndep.
Kumta halor katei ka surok, ka FKJGP Mawliehbah Area Unit ka la dawa na ka tnat PWD ba kan shim khia bad bthah ïa ki kontraktor ban trei pyndep noh.
