Jerusalem, Lber:
Katkum ki khubor la ong ba ka Israel ha kane ka kynti ka la pynbna ba kan ailad ia ki paid Muslim ba kin leit sha ka jaka mane Al-Aqsa kaba don hapoh ka nongbah Jerusalem ha ka taïew ba nyng-kong jong ka jingleh niam ‘Ramadan’ kumba long baroh shi katta snem.
Kumta, la ong ba ka Israel kan pynjur ka jing pahara ha kitei ki jaka wat la ka thma kan iaid shakhmat kumba long mynta.
Namar la ong ba man u snem, ki ju don da ki hajar ngut ki paid riewngeit Muslim kiba leit ban pyndep ia ki jingleh niam- rukom sha katei ka jakamane Muslim ‘Al-Aqsa’.
Hynrei katei ka jingleh niam ‘Ramadan’ ha une u snem ka la long ha kum kane ka por ba ka Israel ka dang leit hiar thma khlem sangeh ia ka Gaza Strip namar ka jingsdang leit thombor jong ki lehnoh Hamas kiba synshar ia ka Gaza pyrshah ia ka Israel ha u Risaw mynshem snem.
Katba, na ka liang u Myntri ka tnat National Security jong ka Israel, u Itamar Ben Gvir ha kine ki khyndiat taïew ba la leit, u la ong ba ka Israel kam dei ban ailad ia ki nong Palestine na West Bank ba kin leit ban rung sha Jerusalem na bynta katei jinglehniam.
Namar utei u Myntri u la pynshai ruh ba kumno ka Israel kan ailad ia kitei ki jaitbynriew nong Palestine ba kin leit rakhe bad lehkmen ne lehniam ha katei ka por lehniam jong ki bad kata ruh kin leit sha Jerusalem, katba ia ki briew jong ka Israel pat ka Hamas ka dang bat bad pynsaja haduh mynne- mynta. Namarkata, u la ong ba ka long ka bym lah ban pdiang lada ka Israel kan ailad ia ki nong Palestine ba kin leit rung sha Jerusalem bad ba kin pyndep ia katei ka jinglehniam kumba ju long man u snem.
Katei ka jingpynbna na ka liang ki bor pyniaid ka Israel ka wan ruh hadien ba ka United States ka la kyntu ia ka Israel ba ka dei ban ailad ia ki paid riewngeit Muslim ba kin leit ïashim bynta ha katei ka jinglehniam hapoh ka jaka mane Al-Aqsa wat la kam lah ban sangeh shipor ia ka thma.
