New Delhi, Lber:
Ka All India United Democratic Front (AIUDF) ka la dep ban rai ba ka la don jingthmu ban ïakhun ha 3 tylli na 14 tylli ki Lok Sabha konstitwensi ha Assam ha ka ilekshon ka ban sa wan. Hadien ba la dep ban pynlong ïa ka jingïalang jong ka General Council ha ka Lah Sngi U Blei, ka seng ka la rai ban pynïakhun ïa ki kyrtong ha ka ilekshon na Dhubri, Nagaon, bad Karimganj.
Katkum ka jingïathuh ka tyllong khubor kaba la wan na ka seng AIUDF la ong ba ka seng ka la don jingthmu na ka bynta ban pynrung kyrteng ïa u MP ba mynta bad u nongïalam ka seng u Badruddin Ajmal, na Dhubri konstitwensi sa shisien pat. U Aminul Islam, uba long u heh nongïalam bad u MLA jong ka Dhing u la pynbna ba un sa ïakhun na Nagaon konstitwensi.
U Dr. KM Baharul Islam na Karimganj u la shah ithuh ba un sa ïakhun na ka konstitwensi kaba lai ha kaba ka seng AIUDF kan sa pynïakhun. U Aminul Islam u la ong ba ka seng AIUDF ka la ai ïa ka rai kaba khatduh na ka bynta ban pynïakhun ïa u na Dhubri, ïa ki kyrtong ki ban ïakhun na Nagaon bad Karimganj yn sa pyntikna shen.
Na ka bynta ki 11 tylli ki kongstitwensi kiba dang sah ka seng AIUDF ka la don jingthmu na ka bynta ban phah ïakhun da ki kyrtong kiba kham khlaiñ bor ban ïakhun pyrshah ïa ki kyrtong jong ka seng BJP bad ki seng synrop jong ka.
