Nongstoiñ, Lber 08
Ka New Nongstoiñ Sports Social & Cultural Club (NNSSCC) ka la pyntip ba wat la ka lympung ïaleh -kai Invitation Knockout Football Tournament 2023 -24 ka la sangeh katto katne por, hynrei yn sdang ban bteng biang ha ka 13 tarik mynta u bnai.
U Bah G.Syiemlieh, President ka NNSSCC u la ong ba na ka liang jong ka NNSSCC ka pan map ïa baroh ki paidbah riew ïeit phutbol ïa ka jingpynslem bad sangeh shipor ïa katei ka lympung. Ka daw halor kane ka long namar ba ka klob ka ap ïa ka kynhun napoh Kolkata, kata ka Peerless FC kaba la jam sha ka semi final, hynrei kaba sngewsih hadien ba ki la ap katei ka kynhun ka la phah ïa ka khubor ba kam lah shuh ban wan pyndep ïa ka jingïakhun semi final na ka daw ba ka don ha ka jingpynkhreh ïa ka Kolkata League.
U Bah Syiemlieh u la ong ruh ba ha ka jingshisha ka Peerless FC ka dei ka kynhun kaba la jam sha ka semi final ka ban ïakhun pyrshah ruh ïa ka Ri Bhoi United FC, hynrei da ka jingbym lah shuh ban wan, na ka liang ka tournament committee bad ka NNSSCC hi baroh kawei ka la shim ïa ka rai da ka jingïasngewthuh jingmutlang hapoh ka tournament committee ba yn shim noh ïa kawei ka kynhun kata ka Rocky FC Nangkiew kaba dei napoh ka Jylla, ha kaba kane ka kynhun ïalehkai ka la long kaba la pynkhreh bad kaba la pynbit pynbiang ha kaba ïadei bad ki rangïalehkai.
Shuh shuh u Bah Syiemlieh u la ong ruh ba ka tarik kaba la pynbeit na ka bynta semi final (1st leg) kan long ha ka 13 tarik mynta u bnai ha ka por 2 baje janmiet hapdeng ka Ri Bhoi United FC pyrshah ïa ka Rocky FC Nangkiew (kaba wan mih buhji ha ka jaka jong ka Peerless FC, Kolkata).
Nangta, ka semi final (2nd leg) hapdeng ka Shillong Lajong FC pyrshah ïa ka Blue Bomber’s FC pat kan long ha ka 18 tarik ha ka por 2 baje janmiet, katba ka Ri Bhoi United kan ïakynduh biang pyrshah ïa ka Rocky FC Nangkiew ha ka 25 tarik.
Shuh shuh la bynrap ruh ba kum ka jingpyntip ba na bynta ka 9 tarik ym shym la don jingïalehkai shuh, hynrei ka jingïalehkai kan long beit ha ka 13 tarik.
Na ka liang ka NNSSCC ka la pynpaw ruh ïa ka jingpan map ïa baroh ki paidbah riew ïeit phutbol halor ka jingbym lait jong ki rangïalehkai bad ki kynhun ban wan ha kine ki taiew kiba la dep ban ïashim bynta namar ka jingïatyngkhuh bad kiba bun ki lympung ïalehkai kum ka I-League, Santosh Trophy, hynrei mynta yn ïoh ban bteng biang ïa katei ka lympung .
Kumta sa shisien ka khot ïa ki paidbah ba kin wan ban sakhi ïa katei ka jingïalehkai semi final ha ka 13 tarik bad na ka liang ka synjuk ka la khmih lynti ba ka jingwan jong ki paidbah kan nangai mynsiem ïa ka klob ban ïai bteng ban pynlong ïa ki lympung ïalehkai khnang ba yn ïoh ban wanrah ïa ki sap ki phong jong ki rangïalehkai jong ka Jylla bad na kiwei pat.
