Shillong, Lber 10
Ka synjuk ïalehkai jong ka Shillong Sports Association ka la rai ban sdang noh ïa ka lympung Shillong Premier League (SPL) 2023 naduh ka 20 tarik mynta u bnai ha First Ground (SSA Stadium) kaba ha Polo, Shillong.
Kane ka rai ka la wan hadien ka jingïalang kaba ar sien ba la long hapdeng ka Tournament Commit-tee jong ka SSA lem bad 8 tylli ki klob kaba la long ha ka Sngi Saitjaiñ ha shlem treikam jong kane ka synjuk.
Haba ïakren bad ki nongthoh khubor hadien ba la kut ka jingïalang, u Chairman ka Tournament Committee u Bah Robert Dkhar u la ïathuh ba na ka daw jong ka jinglyngkot ka por, ka SSA ka la rai ba ïa ka lympung SPL 2023 yn pynïalehkai noh tang ïa ka wat kaba nyngkong (first leg) ym kumba ju pynlong ha ki aïom kiba la dep. “Te kumta ha kane ka lympung yn ym don ki kynhun ki ban shah pynhiar kyrdan. Te kumta ha ka SPL 2024 kin don noh haduh 10 tylli ki kynhun.”
Ka Laitkor Sports Club bad ka Nongrim Hills Sports Club kiba la kiew kyrdan sha kane ka lympung kin ïoh ban ïashim bynta lang ha ka SPL 2024 ka ban sa long shen mynta hi u snem.
“Ki 4 tylli ki kynhun ki ban wan ha ki kyrdan ba hakhlieh kin ïoh rung sha ka semi-final. Kine saw tylli ki kynhun kin ïoh rung ruh sha ka lympung Meghalaya State League ban sa pynlong shen da ka Meghalaya Football Association,” la ong u Bah Robert.
Haba kylli kiei ki kynhun ki ban ïakhun nyngkong ha katei ka sngi sdang, u Secretary ka SSA u Bah SS Rapthap u la ïathuh ba ka Nongthymmai kan ïakynduh pyrshah ïa ka Rangdajied United Football Club. “Ha kane ka kynti kaba mynta ki rangïalehkai kiba la shu shim wai (loan) ki lah ban ïashim bynta naduh kaba sdang kane ka lympung,” u la ong.
Ka lahduh ha kane ka lympung kan ïohpdiang ïa ka khusnam pisa kaba `3 lak bad kaba wan ba ar kan ïoh `1.5 lak.
Ki 8 tylli kynhun ki ban ïashim bynta ha ka SPL 2023 ki long ka Mawlai Sports Club kaba long ka lahduh jong ka aïom ba la dep, kumjuh ka Rangdajied United Football Club kaba long ka lahduh ha ka Meghalaya State League, ka Shillong Lajong Football Club, ka Langsning Football Club, Ryntih Sports Club, Nangkiew Irat Sports Club ryngkat ki kynhun ba dangkiew kyrdan thymmai kata ka Sawmer bad ka Nongthymmai.
