Bengaluru, Lber:
Ka Housing Society ha Bengaluru kan sa pyntreikam da ka kuna T. 5,000 ïa kino kino ki nongshong shnong halor ka jingpyndonkam bakla ïa ka um ha kum kane ka por ba kyrduh um ha ka nongbah.
Nalor kane la thmu ruh ban buh da u nongpahara uba kyrpang u ban khmih bniah halor ki rukom pyndonkam ïa ka um. Kiba bun na ki Housing Society kiba don ha Bengaluru ki la kyntu ïa ki nongshong shnong ba ki la dei ban long kiba phikir bha ha kaba ïadei bad ka jingpyndonkam ïa ka um khnang ba kan ym long lehnohei ha kum kane ka por ba dang jur ka jingkyrduh um.
Ki katto katne tylli ki jaka kiba la shah ktah jur na ka jingkyrduh um ki kynthup ïa ka Whitefield, Yelahanka bad Kanakpura. Ha ka jingthoh ba la phah sha ki nongshong shnong jong ka, ka Palm Meadows Housing Society kaba don ha Whitefield, ka la ong ba kam shym la ïoh um na ka Bangalore Water Supply and Sewerage Board (BWSSB) da bun sngi. Ka la ong, “ngi la ïaleh katba lah ban pynbiang halor kane da kaba ksam um bad pyntreikam ïa ki umpohliew kham kloi katba lah”. Khnang ban lah ban pynbiang ïa kine ki jingeh kiba mih na ka jingkyrduh um, ka Community ka la ong ba ka la rai ban pynduna noh ha kaba ïadei bad ka jingpyndonkam um da kumba 20 per cent na man ka 1 Unit.
