Shillong, Lber 10
Ka NFU Cricket Club ka la ïoh jingjop ha ka lympung ïalehkai Super Division Shillong Cricket League ba la pynïaid da ka Shillong Cricket Association kaba la long ha ka Sngi U Blei ha madan Polo.
Haba phai sha ka jingïalehkai, ka Spartan Cricket Club kaba la jop ïa kynting pisa ka la kam trai shwa ban kawang bol nyngkong. Ka NFU kaba la tied nyngkong ka la kamai 281 run na ki 45 tylli ki over bad hap haduh 6 tylli ki wiket.
U Kevin marwei u la tied haduh 123 run na ki 75 tylli ki bol bad u Purajit Mandal u la tied 65 run na ki 113 tylli ki bol, katba u Ankit Yadav ka Spartan uba la kawang 9 over u la shim 4 wiket bad ai 45 run bad u Mani Bhusan Thakur uba la kawang 8 over, u la shim 1 wiket bad ai 51 run.
Haba beh ïa katei ka thong kaba heh, ki nongtied ka Spartan ki la lah ban kamai tang 156 run na ki 33.1 over bad hap lut baroh ki wiket. De tang u Uttam Chanda uba la ïalehkai bha da kaba ïoh 46 run na ki 47 tylli ki bol bad u Dipankar Barua u la tied 29 run na ki 40 tylli ki bol, katba u Laxman Gurung uba la kawang 6 over u la ai 40 run bad shim 2 wiket, u Akash pat u la shim 1 wiket na ki 6 over bad ai 22 run.
Kumta kane ka la pynlong ïa ka NFU ba kan jop ïa kane ka jingïalehkai da 125 run. Ka kane ka sngi ïa ka nam ‘Player of the Match’ la ïoh da u Kevin uba la tied 123 run tang na ki 75 tylli ki bol bad ban shim ruh 1 wiket.
