Jowai, Lber 10
Kum shi bynta ban pynmih pisa na ka bynta ka “1st War Jaiñtia Scholarship Examination 2024”, ka War Jaiñtia Student’s Union (WJSU) ryngkat ka jingïatreilang bad ka Organising Committee Amlari Model UP School ki la pyllait paidbah ïa ka tiket jong ka ‘Lucky Draw’.
Ïa kane ka tiket la pyllait paidbah da u Bah Katdoh Rymbui, Superintendent of Police ba la shongthait ha ka jingïalang kaba la long ha Community Hall, Pdengshakap ha ka 9 tarik Lber.
U Everest Langstang, Publicity Secretary ka WJSU u la ïathuh ba ïa ka War Jaiñtia Student Union la seng ha u snem 2000 bad la sangeh noh ka jingtreikam naduh u snem 2015, hynrei hadien ka jingïohi ïa shibun ki jingeh hapoh ka thaiñ War Jaiñtia, la pynkhie im biang ha u snem 2023 da kaba thung ïa ki nongïalam bad nongkitkam bathymmai.
U la ïathuh ruh ba ka thong ban pynlong ïa ka ‘1st War Jaiñtia Scholarship Examination 2024’ ka long ban kyntiew bad ai mynsiem ïa ki khynnah ka thaiñ ha ka liang ka pule-puthi namar ka jingnang jingstad ka long ka waitlam bad ka stieh na ka bynta ka lawei jong ka jaidbynriew kumjuh ka roi ka par. Ha kaba ïadei bad ka baibam, u la ong ba ka dei na ka bynta ki khynnah skul kiba shong klas V, VII bad IX. Ki khynnah kiba kwah ban ïoh ïa kane ka baibam ki hap ban ïakhun ïa ka eksamin ban pynlong lyngba ki 14 tylli ki kynhun ka thaiñ Amlarem kaba ïa ka tarik ïakhun eksam yn sa pynbna hadien.
Ka song pisa ban sam sha ki khynnah skul ka shong ha ka jinglah ban pynmih ïa ka ïarong pisa na kaba die ïa ki tiket.
