Shillong, Lber:
Ka KSU Laban Circle ha ka Sngi Balang ka la buh dorkhas ha u Chairman ka tnad MeECL bad ïakynduh ruh ïa u Director ka MePDCL halor ka jingkynnoh tuh bording jong ki briew kiba sah be-aiñ ha Maxwelton Estate.
“Ka Seng ha ka dorkhas ka la pynpaw ba ki briew kiba sah ha Maxwelton Estate ki la ïoh ïa ka bording da kaba leh tuh ne shu pynïasoh lang bad ki briew kiba ïadon ‘meter light’. Ka seng ka pynpaw ruh ïa ka jinglyngngoh ba kumno kine ki briew ki ïoh ban ring bording haba kim shym don kino-kino ki kot ki sla kiba biang,” la ong ka kyrwoh na u General Secretary ka KSU-Laban Circle, samla Jason Laloo.
Ka seng haba kdew ba wat ka Dorbar Shnong ruh kam shym la ithuh ne ai kot ïa ki briew kiba sah ha katei ka jaka, ka la ong ba ki ‘riew paidbah shuwa ban ïoh bording ha ïing ki hap ban pynshisha ïa ka jinglong trai jong ki halor ka khyndew ne ka ïing kaba ki shong ki sah.
“Hynrei kaba lyngngoh ka long ba baroh kine ki briew ba sah be-aiñ ha kane ka jaka ki ïoh ban ring bording bad kumno na ka liang ki bor pynïaid kim shym la jurip bad ki shu sngap jar baroh shi katta. Kane ka jingleh jong ka MeECL lehse ka lah ban long kawei na ki dawbah ba ka tnad ka don hapdeng ka jingkyrduh pisa,” la ong u samla Laloo.
Shuh shuh ka seng ka la ban jur ba dei ban phah mardor ïa ki bor pynïaid sha katei ka jaka ban khmih hi da lade ïa kitei ki kam tuh bad ban ot mardor ïa kiba tuh bording kumjuh ban pynshitom ïa ki katkum ka aiñ.
“Ka Seng ka la dawa ba ka MeECL ka dei ban jubab da ka jingthoh sha ka Seng halor ka jingïoh bording kine ki briew kiba sah be-aiñ ha kane ka jaka,” u la ong.
