Paris, Lber:
Katkum ki khubor, la ong ba ka Iran ka la sdien phasi haduh 834 ngut ki koidi hapoh jong u snem 2023. Kane ka long ka jingkheiñ kaba bun tam hadien ba la sakhi ia kane kajuh ha u snem 2015 ba la iohi ia ka jingshim rai kaba eh jong katei ka ri pyrshah ia kito kiba don kti ha ki kam runar bad kiba pynkheiñ aiñ ne leh pyrshah ia ki kyndon aiñ ba la buh jong katei ka ri.
Katba, ka jingdon jong kito kiba shah sdien phasi ha ka Iran ha kiwei kiwei pat ki snem ba la leit ka long tang kumba 43% ha u 2022.
Kumta la ong ba ka Iran Human Rights na Norway bad ka Iran Human Rights na Paris, ki la pyrshah jur halor katei ka jingshim rai da kaba shu phasi jong ki bor pyniaid ka Iran ha kine ki sngi.
Kitei ki tnat na Norway bad Paris ki la ong ba ka Iran ka la shu pyndonkam bakla ia ka bor bad ka la shim ia katei ka rai (phasi) tang ban pyntieng bad pyn khynñiuh ia ki paidbah nongshong shnong haba iadei bad ka jingiakhih paidbah jong ki nongshong shnong ka Iran namar ka jingkhlad jong ka samla Amini ha u Nailur, 2022.
Namar kata, la ong ba ka Iran ka la leh donbor ha kiba bun ki liang bad kiba bun ki bynta ba kam shym pyrkhat shuh ia ka jingktah haba iadei bad ka jingsngew bad kumjuh ruh ka jinglong-jingman bad ka roi- ka par hapoh ka ri.
Namar la ong ba ka Iran ka la dep phasi haduh 9 ngut ki briew kiba don kti ha ka jingthombor bad jing-iakhun pyrshah ia ki bor pahara kiba don hapdeng ka jingiakhih ha kaba 2 ngut ki dei kiba la shah phasi ha utei u snem (2022), 6 ngut pat hapoh u 2023 bad uwei ha u 2024.
La ong ba kham bun na kitei kiba shah rai pyniap ha ka Iran ki dei na ka jaitbynriew Sunni Baluch jong ka thaiñ Shathie-mihngi jong ka Iran.
Lada kheiñ kyllum lang baroh la ong ba ki don kumba 167 ngut kiba dei na ka jaitbynriew Baluch kiba la shah rai sdien phasi hapoh u 2023.
