Hynriew tylli ki jingbthei bom IED (Improvised Explosive Device) hapoh lai snem tam ki la jia ha Rilum Khasi Jaiñtia. Hashwa jong ka jingbthei bom IED ha Them Ïew Mawlong ha ka 9 tarik Lber, 2024, ka jingbthei bom ba khatduh ka dei ha Khyndailad ha ka 30 tarik Kyllalyngkot, 2022. Kiwei pat ki jingpynbthei bom ki la long ha ïew Shyllong, Laitumkhrah ha ka 10 tarik Nailar, 2021, ha Police Reserve, Khliehriat ha ka 14 tarik Naitung, 2021, ha ka jaka sah ki nongtrei ka M/S Star Cement, Lumshnong ha ka 12 tarik Nohprah, 2020 bad ha ka shnong Soo Kilo ha East Jaiñtia Hills ha ka 27 tarik Naiwieng, 2020. Kine ki jingjia ki la pynher syrngiew ïa ki nongshong shnong. Shu donbok pat ha baroh kine ki jingjia, ym shym la don kiba khlad lane kiba mynsaw jur.
Tangba ka long kaba lyngngoh ba ka tnat syntiat jong ki pulit ka khlem lah ban leh eiei lypa ban ïada na ka jingbthei jong kitei ki bom. Hato ka tnat syntiat ka la tlot shaba palat haduh ba kam lah shuh ban ïoh jingtip lypa ba kan don ka jingpynbthei bom? Ka dei kane ka tnat kaba donkam bha namar ka lah ban khanglad ïa kino kino ki jingjia hashwa ba kin jia. Namar ka jingbym pat lap ïa kiba donkti ha katei ka jingjia, na ka liang ki pulit ka East Khasi Hills ki la tyrwa syndon da ka buskit kaba `1 lak sha kino-kino ki nongshong shnong kiba wan shakhmat ban ai jingtip ba thikna halor kito kiba dei shisha kiba donkti.
Na ka liang u Superintendent of Police (SP) ka East Khasi Hills, u Rituraj Ravi, u la ong ba ïa katei ka jingjia la kheiñ kum ka kam pyntriem bad ka jingpynsaja ka long katkum ki kyndon jong ka Unlawful Activities (Prevention) Act bad Explosive Substances Act, bad kito kiba la donkti ki la leh ïa ka kam pyntriem bad ka ïasyriem bad ka jingïakhun pyrshah ïa ka Ri. Namarkata, u la ong ba kino-kino kiba lah ban ai ïa ki jingtip ba thikna ka ban ïalam sha ka jingïohkem ïa kiba donkti kin ïoh ïa ka buskit da ka pisa kaba `1 lak. U la ong ruh ba yn buhrieh ïa ka kyrteng jong ki nongwan ai jingtip. Kino-kino kiba don jingtip ki lah ban phah khubor ha u nombor 9366790273 lane lyngba ka email: [email protected].
Ha kaba ïadei bad ka jingjia ha ka 9 tarik Lber, 2024, ki pulit ka East Khasi Hills ki la pynsted da kaba kynthoh ba ka jingbthei bom IED ka ïasyriem bad ki jingbthei bom ba la leh da ka seng Hynñiewtrep National Liberation Council (HNLC) ha ki snem kiba mynshwa ha ka Rilum Khasi Jaiñtia. Tangba ki pulit ki khlem pat lah ban pynshisha ne pynthikna mano kiba donkti ha katei ka kam pynbthei bom. Ha kajuh ka por, haduh mynta, ka HNLC lane kiwei pat ki kynhun ne ki ‘riew shimet ki khlem pat wan shakhmat ban shim jingkitkhlieh halor ka jingbthei bom ha Them Ïew Mawlong. Ngi la mad ïa kiba bun ki jingeh namar ki kam pyntriem bad ïaumsnam. Ka shongsuk shongsaiñ kaba synjor ka wanrah ïa ki jingeh kiba bun rukom. Ngim tharai ba kiba bun kin kwah ban mad biang ne ïohi ïa kito ki sngi bad ki ïa jong ka jingsyier bad jingbym don ka jingsuk. Dei ban shimkhia lang na baroh ban pynthikna ba ka shongsuk shongsaiñ kan ym phet shajngai bah haduh ba ban da ïoh biang kan jynjar shibun. Tang kiba la mad kin sngewthuh ïa kata.
Ngi sngewlyngnoh ruh ba ka jingbthei bom ha ka 9 tarik Lber, 2024 ka la long ha ka jaka ba la syrtap da ki pulit ki swar naduh u snem 2018 hadien ba la mih ka jingïakhih kaba jur. Lehse ka jingïohlad jong ki briew kiba kwah ban buh jingsyier ha Shillong bad khamtam ha katei ka jaka ka dei namar ka jingtlot ha ka jingtreikam ka tnat syntiat bad ka jingkheiñ sting jong ki bor pahara. Katei ka jingjia ha Them ïew Mawlong ka long biang ka jingkyrsiew thiah ha ka sien ba hynriew ïa ka tnat pulit baroh kawei ba kan long kaba husiar bad khamtam ban pynkhlaiñ ïa ka kynhun syntiat jong ka khnang ban lah ban ïada ïa kiba kum kine ki kam pyntriem kiba buh jingsyier ïa baroh ki nongshong shnong.
Ngi kyntu ruh ïa baroh ki nongshong shnong ba kin long kiba husiar nangne shakhmat khamtam haba ki leit sha ki jaka paidbah namar ngim lah ban tip kaei ka ban jia. Ki jingjia kum kitei kiba la jia ha Them ïew Mawlong ki dei ban pynlong ïa ngi baroh kiba sian khnang ba ngin lait na kano-kano ka jingjia ba sngewsih. Ha kajuh ka por ngi dei ban kiar na ki jaka haba don kano-kano ka jingsuba ba don ki kynja jingpynbthei ba la buh ha ki pla ne kiwei pat ki jingsong bad ym ban ïa leit tur bad ban peitkai. Ailad ïa ki pulit ba kin leh ïa la ka jong ka kamram.
