Shillong, Lber 10
Ar tylli ki skul ha Mawkynrew konstitwensi ki la ïoh myntoi lyngba ka skhim MLA lane Special Rural Work Programme (SRWP) kaba la mang lyngba u MLA, Bah Banteidor Lyngdoh.
Kine ki skul ki kynthup ïa ka Holy Cross Higher Secondary School, Mawkynrew bad ka Mawkynrew Presbyterian School ha kaba ka skul Holy Cross ka la ïoh ka bos kit khynnah skul katba ka skul Mawkynrew Presbyterian ka ïoh ïa ka Ïingskul kaba thymmai.
Ïa kane ka bos skul la aiti na ka mang tyngka kaba long `10 lak katba ïa ka ïingskul pat la shna na ka mang tyngka jong ka Special Rural Work Programme (SRWP) 2022-2023 kaba long `8 lak.
Ïa ka jingïalang ban aiti ïa ka bos skul la pynlong ha ka 8 tarik Lber, 2024 ha kaba la donlang ki bor pynïaid ka Holy Cross Higher Secondary School, ki nongïalam ka Balang Katholik, ki khynnah skul nalor kiwei pat. Ka skul ha ryngkat ka jingsngewkmen ka la pynlong ïa ka prokram kum ki jingai jingkren khublei ïa u MLA na ka liang ki bor pynïaid skul bad ki jingrwai jingshad na ki khynnah.
Haba kren kum u kongsan ha ka jingïalang, U MLA u la pynbna ban ai sa `10 lak na ka bynta ban pynheh ïa ka ïing skul kumba la ïamir jingmut bad ki bor pynïaid jong ka skul.
Kumjuh, ha ka jingïalang plie ïa ka ïingskul kaba thymmai jong ka Mawkynrew Presbyterian School, la donlang ki bor pynïaid kane ka skul, ki nongïalam shnong nalor ki nonghikai bad ki khynnah skul.
Nalor kane ka jingplie ïa ka ïingskul kaba thymmai, u Bah Banteidor u la kular ba un peit bniah ïa ki jingdonkam ban nang pynbha shuh shuh ïa kane ka skul.
U Bah Banteidor ha baroh ar tylli ki jingïalang ha kine ki skul, u la kren shaphang ka jingangnud jong u ban kyntiew ïa ka pule puthi hapoh ka thaiñ.
U la ong ba na ki jingai sha ki skul hapoh ka konstitwensi hi bunsien kam ju long lehnohei bad kumta u ïohi bad ïai kyntu ban don ka jingïatreilang na ka por sha ka por ban kyntiew ïa ka thaiñ ha ki liang baroh.
