Shillong, Lber 10
Ka Riwar Mihngi Football Association (RMFA) ka la pynlong ïa ka jingjied ïa ki nongkitkam (Office Bearers) kiba pura jong ka samoi treikam 2024-27 lyngba ka ilekshon kaba la pynlong ha ka 9 tarik mynta u bnai ha ïing durbar shnong ka Urksew Wahpathaw.
Ïa kane ka ilekshon la pynïaid da ka Election Committee jong ka Riwar Mihngi Football Association ba la ïalam da u Bah Wanhun Massar kum u Chairman ha ryngkat u Bah Summit Massar, kiba la ju long teng ki nongïalam ha ka imlang sahlang jong ka thaiñ Riwar Mihngi.
La pynïaid ïa katei ka ilekshon jied nongkitkam ba pura katkum ki kyndon riti treikam ka synjuk. La wan ïashim bynta da baroh 16 (Khathynriew) tylli ki Sports Club, Football Club ba la pynïasnoh bad ka synjuk (affiliated). La pynshongkun shuh shuh ïa ka jingïajied nongkitkam da ki pyrman (Observer) na ka Meghalaya Football Association kiba kynthup ïa u Bah Sunesh Syiem bad Bah Dipshon Ryntathiang kiba la pynshisha ruh ba katei ka kam ka long kaba bit ba biang bad ïaid beit ïaid ryntih katkum ki kyndon treikam ka Meghalaya Football Association.
Ki nongkitkam ba la jied bad pynskhem na ka bynta ka samoi treikam 2024-27 ki long President Bah Iengskhem Diengdoh, Vice President Bah Largest Laso, General Secretary Bah A Dapborlang Kharbudon, Asst. General Secretary Bah Kitdor Khongsdam, Finance Secretary Bah Aimusing Khongjee. Bad la aiti ha kitei ki nongïalam ba kin pyndep ban thaw ïa ka Executive Committee kiba ïadei dur bad ka riti treikam bad ruh ba ki dkhot kin ïadonbynta lang na baroh ki bynta ka Riwar Mihngi.
Hadien ka jingïajied, la ïoh ki jingkren kyntu kynpham na ki nongïalam ka Meghalaya Football Association bad ki kyntien khublei na u President ka Association sha baroh bad ha kaba u la pyntip ba ka jingïalehkai final jong ka Senior Men League 2023 yn pynkut ha ka 16 tarik Lber 2024 ha ka por 2 baje mynsngi ha UUP Stadium Urksew, Pynursla bad ki club ki ban ïaknieh ïa ka nam lahduh kin long ka Pynursla United Youth Club pyrshah ïa ka Lapalang Sports Club.
