Washington, Lber:
Ki shipai ka United States ha ka step Sngi Saitjaiñ ki la ïoh ban siat pynbthei haduh 15 tylli ki drone kiba la leit pynher da ki lehnoh Houthi na Yemen sha ki bynta jong ka Red Sea bad ka Gulf of Aden.
Tang hadien ba la ïohsngew ïa kane ka khubor na ka US, katei ka kynhun lehnoh kaba ju ïoh jingkyrshan na ka Iran, ka la pynbna ba ka la ther bun tylli ki ‘namding sha ka jhad jong ka US. Ym tang kata, hynrei ka la phah ruh ia bun tylli ki drone ban leit thombor ia katei ka jhad ba don ki shipai US bad kiba kit ia ki mar jong ka US lyngba jong ka Red Sea bad ka Gulf of Aden.
La ong ba ka long ka sien kaba nyngkong eh ba ka Houthi kan ther ‘namding bad kan leh kput haduh kattei ïa ki jhad kiba leit poi sha ki bynta jong ka duriaw Red Sea bad ka Gulf of Aden. Ka daw bah halor katei ka jingleit kput jong ka Houthi ka long namar ka jingleit ai jingkyrshan jong ka US ia ka Israel haba iadei bad ka jingleit hiar thma jong ka Israel pyrshah ia ki lehnoh Hamas kiba synshar ia ka nongbah Gaza.
Kumta la ong ba ka CENTCOM bad ki shipai ba iatrei lang ki la pyntip ba ki la ioh ban siat pynbthei ia bun tylli ki drone kiba thmu ban leit thombor bad pynjulor ia katei ka jhad katba ka dang iaid lyngba ia katei ka bynta jong ka duriaw ha katei ka step.
