Shillong, Lber 10
U nongïalam ka Meghalaya Pradesh Congress Committee (MPCC), Bah Manuel Badwar u la ong ba wat la ka Congress bad ka Trinamool Congress (TMC) ki ïaid la ka jong ka lynti ha kane ka ilekshon ban wan sha ka Lok Sabha hapoh ka Jylla, ka ‘INDIA Bloc’ ka dang skhem.
“Ka dei ka jingai bad jingshim ne ka ‘give and take policy’. Kumta ki don ki jaka ha kaba ngi hap ban ïakren pynbeit na bynta jong ngi bad ha kiwei, kiwei pat ki seng kin hap leh ïa kane,” la ong u Bah Badwar.
U la ong ruh ba haba phai sha ka Tura Parliamentary konstitwensi, ka Congress ka don ïa u kyrtong uba biang, uba dei ruh u MLA, u Saleng A. Sangma.
Utei u nongïalam u la ong ba u Sangma u long u kyrtong uba i don jingkyrmen ban poi sha ka thong ban un sa pyni ïa ka jingshisha haba ïadei bad ka jinglong-jingman da kaba bynrap ba kane kan wanrah ïa ka jingmanbha na bynta ka synshar paidbah hapoh ka ri.
“Lada ka Congress ka jop, ka imlang-sahlang ka jop. Lada ka Congress kam da khlaiñ, ngeit ne phim ngeit, ka imlang-sahlang ruh kan sa pulom khamtam ha kane ka jinglong-jingman jong ka jingleh donbor,” la ong u Bah Badwar.
U la ong ruh ba ha ki Jylla kum ha Uttar Pradesh bad Bihar, ka ‘INDIA Bloc’ ka long kaba khlaiñ bor, ha kawei ka liang kaba kdew ba ka seng kaba ïatreilang ka long kaba kloi ban trei bad ka Congress.
“Hynrei kam mut ba kin don pat ki ban hap pynbor ïa ngi ne ngi ngin pynbor ïano-ïano. Ka dei ban don ka jingïadei ha kaba baroh ar ngin poi sha ka thong. Kan ym lah ban long ka jingïadei ha kaba ka don tang ka shim bad ym ka ai,” u la ong.
U la ong ba lada kum kane ka jingïadei ka wan jia, ka Congress kan ïeng skhem bad ka seng ka dei ruh ban tip hangno ka jingkhlaiñ jong ka, ka shong.
Katkum ka jingong u Bah Badwar, ka ‘INDIA Bloc’ kam khih bad ka neh kumba long bad ka Congress ka tip badno kan ïashim bynta bad ban ïateh lok.
Ka sienjam na bynta ka jingïatylli ka liang pyrshah hapoh jong ka ‘INDIA Bloc’ ha shuwa jong ka ilekshon sha ka Lok Sabha haba phai sha Meghalaya ka la sakhi ïa ka Congress kaba la ïaid shakhmat ban pynbna ïa ki kyrtong na bynta ka Shillong bad Tura Parliamentary konstitwensi.
Wat la ka Congress bad TMC ki ïadon lang ha ka ‘INDIA Bloc’, kim shym la lah ban mynjur lang haba ïadei bad ka jingïasam konstitwensi ha ka Jylla.
Ha ka Sngi Thohdieng ba la dep, ki bor ba halor ka Congress ki la pyllait ïa ka thup kyrteng banyngkong jong ki kyrtong na bynta ka ilekshon ban wan sha ka Lok Sabha. Katkum katei ka thup kyrteng, u MP ba mynta, u Bah Vincent H. Pala un ïakhun na ka Shillong katba u MLA ka seng, u Saleng A. Sangma un ïakhun na Tura.
