Shillong, Lber 10
Ki pulit ka East Khasi Hills ha ka Sngi U Blei ki la ong ba ka jingbthei bom Improvised Explosive Device (IED) ha Them Ïew Mawlong ha ka miet Sngi Saitjaiñ ka ïasyriem bad ka jingpynbthei bom da ka seng Hynñiewtrep National Liberation Council (HNLC) ha ki por kiba mynshwa ha kiwei pat ki jaka wat la ym pat don satia kino-kino ki seng ne kynhun ne ‘riew shimet kiba la wan shakhmat ban shim jingkitkhlieh halor ka jingjia hynnin ka miet.
Ha u kyrwoh khubor, u Superintendent of Police (SP) ka East Khasi Hills, u Rituraj Ravi, u la ong ba hynnin ka miet ha ka por kumba 10:30, uwei u bom IED u la bthei ha kawei ka jaka ba la shu ker da ki tin bad ka bym shong bym sah briew. Kane ka jaka ka don ha Syndicate Bus Stand, Them Metor ha Ïew Mawlong.
Shuh shuh u SP u la ong ba ïa u bom IED la buh ha kawei ka kynja tin, bad la suba ba ka jingbthei ka dei na ki Gelatin Stick. Hadien ka jingbthei, ka jaka ba la ker da ka tin ka la julor bad ki don ki ïit jong ki ïing ba marjan kiba la pait.
Ha kajuh ka por, u la ong ba uwei u briew uba la ïaid lynti na katei ka jaka, ïa uba la tip kyrteng kum u Lakhan Singh, u la mynsaw malu-mala na kjat namar ka jingher ki saphret kiba la mih na ka jingbthei jong u bom.
“Ka rukom pynbthei ïa u bom ka ïasyriem bha bad ki jingpynbthei bom ha ki por ba la leit noh ha kane ka thaiñ ha kaba ka HNLC, kaba dei ka seng kaba la shah ñiew be-aiñ, ka la shim jingkitkhlieh. Hynrei haduh ka por ba la ai ïa kane ka kyrwoh, ym pat don satia kano-kano ka kynhun kaba la shim jingkitkhlieh halor katei ka jingjia,” la ong u SP.
Na ka liang u SP u la ong ba ki pulit ki la pynrung hi da ka ejahar ha thanat Sadar khnang ba yn lah ban tohkit kham bniah. Ha kane ka ejahar la pynrung da ki kyndon jong ka Unlawful Activities (Prevention) Act bad Explosive Substances Act.
“Ki pulit ka East Khasi Hills kan tohkit bniah halor katei ka jingjia bad ban kem ïa kiba la donkti. Namarkata, ngi pan ruh ïa ka jingïatreilang na ki ‘riew paidbah khnang ba kan long kaba seisoh,” la ong u Ravi.
Ha kawei pat ka liang, haba jubab ïa ka jingkylli, u SP u la ong ba haduh mynta, ki bor bahalor ki khlem pat bthah ban aiti ïa ka jingtohkit halor katei ka jingjia sha ka National Investigation Agency (NIA), kaba dei ka kynhun tohkit jong Sorkar Pdeng bad kaba peit bniah halor ki kam pyntriem. Namarkata, u la ong ba ïa mynta, ki pulit ka East Khasi Hills kin tohkit ïa katei ka jingjia bthei bom.
