Nga la ïoh ban pule ïa ka kotkhubor U NONGSAIÑ HIMA kaba la mih ha ka 6 tarik Lber, 2024, halor ka phang “Synrop ka Riti Dustur ha ka Niam” – Raphael Warjri. Lada dei u Bah Raphael Warjri u ba nga ju ïa ithuh ithaw, ngam banse ban ïathuh hangne ba nga shem ba u long u briew uba ba lah leh ïa ki katto katne ki kam kiba nga dei shisha ban da ïaroh. Hynrei ha kaba ïadei pat bad kane ka phang kaba la mih ha ka kot khubor, nga sngew ba nga donkam ban da kynthoh.
Ha kaba sdang, nga ïohi kumba I long u briew u ba tip lut ïa ki jait niam jong ka pyrthei baroh, phewse ynda ha ba nga pule bniah nga shem pynban ïa ka jingjyndong jingtip jong u nongthoh bad paw pen ryngkew pynban ka jinglong jong u nongthoh namar ba la shu leh batip ïa ka bym tip, bad kaba shu tare ruma khlem da tip yn poi shano. Nga kynmaw haba nga ïoh ban ïa don lang ha kawei ka prokram ba la pynlong da ka Jeebon Roy Memorial Welfare Institute ha ka 16 tarik Jymmang, 1996, u Rangbah Webster Devis Jyrwa, uwei na ki khraw pyrkhat jong ka jaidbynriew, ha ka jingkren jong u, la ong kumne – Ba ka long ka jingshisha ba lymda la seng ïa ka Seng Khasi ha u 1899, ka shad ka kmen, ka rwai ka siaw, ka put ka tem tynrai jong u khun Khasi kin jin da la jah noh ha ka rngai, bad ngin ym lah shuh ban ïoh sngew shuh ïa ki sur thiang jong ka bom ka ksing ne ki sur ba ih jong ka tangmuri, lymne ïohi shuh ïa dur jong ka riam shad tynrai jong kaba kieng da ki maiñ ksiar maiñ rupa”. Une u rangbah u sngewthuh ïa ka umsaw bad ‘erïong ‘erlangthari kaba la wan ban syllad ha kito ki por.
Phewse, haba nga pule pat ïa kane ka jingthoh ba mih ha ka kotkhubor kumba la kdew ha khmat, nyngkong nyngshap nga shem ba kane ka jingkynthoh U Raphael Warjri ka long pyrshah ïa ka Riti Synshar, ka pynsngewthuh bakla ïa uba bun ba lang bad ka long pynban ban pynïapait ïapra. Ban long koh ‘siang pynshad thma, ka long kaei kaei ka bym long. Ban tuklar ïa ka jong kiwei ka long kaba bakla. Une u nongthoh u la sdang ban pyrshang ban pynkhih bad pyntroiñ ïa ki nongrim jong ka Seng Khasi da kaba shu kynthoh ha ki rukom pyrkhat lamwir ba pynlynga ïa u hi namar imat u bapli um ïoh ïa kaba u kwah, long thik kum ka jingïathuh khana shaphang u myrsiang bad u soh grape.
Tang katne shuwa, lada ym pat shai ngin sa nang ïa bteng biang pat.
U Dipshon Lyngdoh Nongbri
Seng Khasi Mawlai, Shillong
