Dubai, Lber:
Katkum ki khubor la ong ba ki lehnoh Houthi sa shisien ki la ther bom biang sha ka jhad kaba iaid sha ki bynta jong ka Gulf of Aden ha ka Sngi Balang. Ha kane ka jingjia 3 ngut ki la khlad ha shen bad 4 ngut ki la mynsaw .
Namar la ong ba kitei ki lehnoh Houthi na Yemen ki ju thombor bad pynthut na ka por sha ka por wat la kitei ki jhad ki dei tang ki jhad kit mar bad kiba shalan mar na kawei ka ri sha kawei pat hynrei kiba hap ban iaid lyngba ia katei ka bynta jong ka duriaw. Dei namar kane kaba la pynkhie bitar ia ka US, ha kaba ka US bad UK ha kine ki khyndiat taiew ba la leit ki la ther ‘namding bad ther bom sha ki jaka treikam jong kitei ki lehnoh Houthi hapoh Yemen.
Ha katei ka jingjia la ong ba utei u ‘namding uba la leit bthei ha katei ka jhad u dei u ‘Anti-shim Ballistic Missile’ bad uba la leit pynbthei ia katei ka jhad Barbados kaba dei jong ki nong Liberia.
Kumta la ong ba ki bor pyniaid bad kiba dei khmih ia katei ka jhad kit mar ki la phet bad ieh noh ia katei ka jhad ha katei hi ka bynta ba ka la julor bad shah ther bom ha ki lehnoh Houthi.
Katei ka jing pyni bor jong ki lehnoh Houthi ka la pynthud ia ka kam khaïi- pateng jong ki ri bapher kiba dei ban pyniaid ia ki jhad jongki na katei ka jaka bad ka la shim ruh ia bun ki mynsiem briew na ka por sha ka por kiba leit ban pynpoi ia kitei ki mar jongki sha kitei ki ri kiba dei ban iaid lyngba ia katei ka duriaw.
