Shillong, Lber 10
Ka Paris St-Germain (PSG) ka la hap ban mad noh ka jingïakhaid da mar 2 kol ha ka jingïalehkai pyrshah ïa ka Reims kaba la long ha Parc des Princes ha ka lympung League 1 ha France. Ha kane ka jingïalehkai, u Kylian Mbappe um shym la ïoh satia ban mih madan naduh kaba sdang hynrei ban long u rangïalehkai shong ben bad ïoh mih bujli haduh ka kylla miet kane ka jingïakhun.
Haba phai sha ka jingïalehkai, ka Reims ka la ïoh ban khyrwit kol nyngkong tang ha ka minit kaba 6 hadien ba u Achraf Hakimi u la bakla bad ai ka bol sha u Marshall Munetsi ban pynkhih jar, katba ha ka minit kaba 17 pat ka kol kaba la bakla thep hi da u Yunis Abdelhamid ka la pynlong ïa ka PSG ban lah pynïakhaid da mar shi kol.
Tang hadien ar minit, ka PSG ka la lah ban tam da shi kol hadien ba u Goncalo Ramos u la ïoh ban khyrwit ïa ka kol kaba hynriew ha kane ka lympung hynrei ha shwa ban put pynwai ïa ka kylla step, ka Reims ka la ïoh ban pynphai ïa kane ka kol kaba ar ba la ïoh thep da u Oumar Diakite.
Haba bteng ïa ka kylla miet, baroh ar liang ki la ïakhun tyngeh ban wad ïa ka kol kaba lai hynrei kim shym la lah. Watla u Mbappe, uba la khreh ban leit pynïasoh noh sha ka Real Madrid ha ka aiom ban wan ynda la kut ka kontrak bad ka PSG, u la ïoh ban mih bujli ha ka minit kaba 73 hynrei um shym la lah ban leh eiei, ha kaba ki rangïalehkai dien ka Reims ki la lah ban khanglad ïa u.
Lah ban pynkynmaw ba u Mbappe u la shah pynshong ne shah bujli noh ha ba kut jong ka kylla step ha ka jingïakhun pyrshah ïa ka Monaco ha ka sngi Thohdieng kaba la lah, hadien ba u Coach u Luis Enrique u la ban jur ba ka club ka dei ban pynmliem lypa ban ïakhun khlem utei u rangïalehkai shakhmat.
Ka PSG kaba don ha ka kyrdan kaba nyngkong ha ka miej ïakheiñ point bad ïoh 56 point, ka lah ban tam da 10 point ïa ka Brest kaba don ha ka kyrdan kaba ar kaba la ïoh 46 point, katba ka Reims pat ka dang ïai neh ha ka kyrdan kaba 9 na ki 35 point ba ka la ïoh.
