Shillong, Lber 10
Ka Jaintia Students Union (JSU) War Jaintia Circle bad ka Syndai Unit ha ryngkat bad ka bor shnong ki la hiar ban khynra naphang ïa ki mynder ri ki bym dei na ka jylla bad na kane ka ri, kiba la wan buhai shnong hapoh ka shnong Lakroh.
Ki dkhot ka seng ha ka jingdon lang ryngkat ki dkhot ka bor shnong ki la khynra ïa ki kot ki sla jong ki poi ei kiba thaw lad ban shong ei bad leh trai hapoh ka shnong Lakroh kaba don ha Amlarem Sub Division kaba don ha khappud bad ka ri Bangladesh.
Na liang ki nongïalam ka JSU hadien ba ki la ïoh jingtip na ki trai shnong ba kine ki mynder ri kiba don hapoh ka shnong kiba la thmu ban shna sa ïa ka ïingmane Blei (Temple) kaba heh hapoh u pud u sam ka shnong khlem da ïoh bor na ki bor shnong, ka seng ka la pynsangeh mardor ïa kane ka jingtei beaiñ kaba la shu leh donbor da kine ki mynder.
Ka JSU ha ryngkat bad ki bor shnong kin sa shnong pyrkhat bad ban pynsngew sha ki bor ka aiñ ban khanglad ïa ki khar poi ei na ka jingwan buhai shnong bad na liang ka seng ka la beh krad ïa kito ki bym don hok ban shong ban sah hapoh ka shnong bad hapoh ka thaiñ hi baroh kawei.
Ka seng ka pynpaw ruh ïa ka jingsngewnguh ïa ki nongïalam shnong Lakroh kiba la kloi ban pyntip sha ka seng ban ïatreilang ban beh krad ïa kine ki khar poi ei na ka shnong bad ka seng ka kyntu ïa kiwei pat ki dkhot ka bor shnong hapoh ka Bri u Hynñiewtrep ba ki dei ban mih shakhmat ban ïatreilang bad ki seng bad ki bor ka aiñ khnang ban ïoh khanglad na ka jingbuhai shnong ki mynder.
