Nongstoiñ, Lber 10
Ha ka janmiet jong ka Sngi Saitjaiñ, ki mombati ki la thaba ban pynpaw ïa ka jingsngewlem bad ka jingpynrem kaba jur halor ka jingshah pynïap dusmon u samla Mackbornbonny Kharbani ha ka miet shiteng synñia jong ka 3 tarik u Lber, 2024 ha kawei na ki jaka ha jaka ïeng taksi Kynroh ha sor Nongstoiñ.
Katei ka jingthaba jong ki mombati ka dei ha kawei na ki jaka kaba ha Nongshillong, Eastern West Khasi Hills, hadien ba ki bahaïing hasem u samla ba la shah pynïap, ka Kur Kharbani, ki nongïalam shnong na katei ka thaiñ, ki dkhot na ki sengbhalang bapher-bapher na ka Eastern West Khasi Hills, ki paidbah, ki nongñiah kali bad kiwei-kiwei kiba la ïashim bynta ban thang ïa u mombati kum ka dak ban pynpaw ka jingsngewlem bad pynrem ïa katei ka jingjia ïa kaba la pynlong da ka HYC – North West Khasi Hills.
Ha katei ka janmiet, ha shuwa ban sdang ka jingthang mombati, la pynlong ruh ïa ka jingïalang kaba lyngkot ha katei ka jaka, ïa kaba la ïoh ruh ïa ka jingai jingkren na ki nongïalam shnong, ki bahaïing u samla ba la shah pynïap, ki dkhot na ka HANM , na ka Kur Kharbani, kumjuh na u President ka HYC, North West Khasi Hills, bad kiwei-kiwei, kiba la dawa ba ki bor ka aiñ kin ai ka jingbishar kaba hok ban pynshitom da kaba tyngeh ïa kiba donkit ha katei ka kam.
Ha katei ka janmiet, la pynlong ruh ïa ka jingsngap jar kaba shi minit bad ïoh ruh ban ïa rwai lang ïa ka jingrwai “Ah jingai ei ba phylla tam”.
U President jong ka Hynñiewtrep Youths’ Council, North West Khasi Hills, u Bah Joplang Kharnaïor u la ong, “Ko ki kynhun ki nongpyntriem, lada phi rieh hangno-hangno, ngi ruh ngi tip hangno phi don.”
U la ong ruh ba hadien ba ka seng ka la ïakren sani bha bad ka ïing ka sem, ka sngewthuh biang ba ka donkam ban pynlong ïa kane ka prokram pynrem ban pyrshah ïa ki ‘riew thrang snam kaba la pynsuhjer ïa ka dong ka thaiñ bad ïa ka jaidbynrew jong ngi ha ki bynta jong ka thaiñ Nongstoiñ.
Shuh shuh u la ong ba ka seng hadien ka jingïakren, ka sngewthuh ba ha ka thaiñ Nongstoiñ ka don ka kynhun pyntriem kaba kwah ban shim ïa ka mynsiem jong utei u samla. Kumta na ka liang ka seng ka phah ïa ka khubor ba ki bor pulit ki dei ban kem mardor ïa kiba donkti kiba dang ïaid sahuh kiba dang lait na ka along. Lada ki bor pulit kim shim ïa ka jingkitkhlieh, ka seng kan sa bthah ïa ki dkhot ba lada ki suba ïano-re-ïano, yn wanrah ha ophis ka seng bad kan shim hi dalade ïa ka jingkitkhlieh ban pyndep ïa ka kamram.
U Bah Joplang u la pynpaw ruh ïa ka jingbitar kaba jur halor jingleh ‘riewkhlaw jong ki runar ban pynïap ïa utei u samla ha kaba u la bynrap da kaba ong ba “phi lah ban buhrieh shipor hynrei bunsien te em.”
