Shillong, Lber 10
U Bajrang Punia bad Ravi Dahiya kiba la khur takma ha ka lympung Tokyo Games ki la hap ban pynkut noh ïa ka jingangnud ban ïoh leit mihkhmat sha ka lympung Paris Olympics ka ban sa long shen.
Ka jingkut jingïaid lynti noh jong kitei ar ngut ki rangïalehkai ka India ban ïoh leit mihkhmat sha ka Paris Olympics ka long hadien ba ki la shah rem noh ha ka jingïaknieh rung sha ka Olympics ha ka Sngi U Blei.
U Punia, uba la dei uwei na ki rangïalehkai ba paw bha ba la don bynta ruh hakhmat ban ïakhih pyrshah ïa u President barim ka WFI u Brij Bhushan Sharan Singh, u la shah liem noh da 1-9 ha ka semi-final jong ka Men’s Freestyle 65 kg pyrshah ïa u Rohit Kumar.
Haba phai sha ka Men’s 57 kg, ba la pynlong ha ka Nordic format, ka la long shisha ka kyrdan kaba kham jwat, ha kaba baroh ar ki nongkhur takma rupa ha ka Tokyo Games kata u Ravi Dahiya bad u Aman Sehrawat ki la don ha ka jingïakhun.
U Dahiya, uba dang shu wan phai na ka jingshitom, u la shah liem noh da 13-14 ha ka jingïakhun pyrshah ïa u Aman. U Aman u la lah ban pynpaw ïa la ka kyrteng hadien ba u la jop takma ha jan baroh ki lympung ha u 2023, ha kaba u Dahiya um shym la ïashim bynta.
Ka jingkut noh ka lynti ïaid u Dahiya, ka dei na ka jingshah rem ha ka jingïakhun kaba bud pyrshah ïa u U-20 Asian Champion u Udit.
Ki nongjop na kane ka trials kin ïoh pat ka lad ban ïakhun ha ka Asian bad World Olympic Qualifiers.
Kumba ka long haduh mynta, ka India ka dang ïoh tang kawei ka bhah na ka bynta ka Paris Games kata lyngba ka Antim Panghal (ha ka kyrdan women’s 53kg).
