Nongstoiñ, Lber:
Ki nongrep motor jong ka thaiñ Umyiap ha West Khasi Hills bad kiwei ki jaka haduh mynta la lai snem kim shym la ïoh satia ïa ka jingïarap na ka sorkar wat hadien ba ki la leit ban pyntip sha ka tnat ba dei peit halor ka jingduh noh ïa u motor na ka jingpynjot jong ki khñiang.
Ki nongïalam ka HFU ki la pynpaw ba naduh u Ïaïong 2022, ka jingwan ki khñiang ka la pynjot ïa ki jingthung Motor ka thaiñ Umyiap ha West Khasi Hills bad kiwei ki jaka. Halor kane na ka liang ki nongrep bad ka HFU ki la leit ïakynduh ïa u District Horticulture Officer ka West Khasi Hills hynrei ki la phah lum thup ha ki Form bad ki nongrep ki la leh kumta ban lum ïa ki nongrep man ki shnong hynrei haduh mynta ym shym la ïoh satia ïa kata ka jingïarap.
Nalor nangta, ki la ong ruh ba ha ka 29.2.2024, ka Hills Farmer Union (HFU) West Khasi Hills District hapoh ka jingïalam u Bah Lumlang Kharsyiemlieh, Secretary ha ryngkat ki nongrep na ka thaiñ Umyiap kiba dei ruh ki dkhot ki la leit ïakynduh ïa u DC ka West Khasi Hills ban kyrpad ban ïarap siew noh ïa ki bad na ka liang u DC u la kular ban ïarap bad leh ïa kaba donkam.
Namarkata, kum ka seng HFU ka kyrmen ba ka Sorkar hapoh ka jingïalam u DC kan ïarap noh ïa ki nongrep lyngba ka Relief Fund ne kino-kino kiwei ki jingïarap.
