Shillong, Lber 10
U Pastor GPL Gadew u la kyntu ïa ki longkmie lada ki poi ha Dorbar Bah jong ka Ri India ka Parliament, ki dei ban sem kumba ki sem ha ïingdorbar thawaiñ ka jylla ban pyni ïa ka kolshor u Khasi.
Kane ka jingkyntu u Pastor ïa ki longkmie ka dei ha ka Jingïaseng Khasi Jaiñtia Presbyterian Synod Sepngi kaba XXII kaba la long ha Ba-lang Presbyterian Laitryngew, Sohra Presbytery.
Ha kane ka jingïaseng ki ‘riewngeit jong ka Balang Presbyterian ki la poi palat ar lak ngut eiei namar man ki jaka shong la buh da ki screen ne ki LED ba ki paidbah kiba shong sha jngai kin ïohi ïa ki nongïashimbynta naduh u Moderator, ki nongpule bad duwai, ki jingrwai choir bad ïa u nongkren.
Ha kane ka jingïaseng la wan ruh ki nongsynshar ka jylla naduh u Conrad K Sangma kum u Myntri Rangbah, u Symbud Myntri Rangbah, Bah Prestone Tynsong bad ki MLA kiba kynthup naduh u Bah Metbah Lyngdoh, Bah Matthew Kurbah, Bah Charles Marngar, Bah Gavin Mylliemngap bad ki MDC naduh u Bah Titos Chyne, Kong Grace Mary Kharpuri, Bah Balajied Rani bad ki ophisar sorkar.
La sam ruh ïa ki khubor jong ka ktien u Blei lyngba ki sur jingrwai na ka Jingïaseng Khynnah Balang Laitryngew, Standing Choir Sohra Presbytery, Standing Choir Shella Presbytery, Balang Kulang, Balang Sohïong, Nongpyndeng, KJP Synod Standing Choir bad Balang Laitryngew.
Ha ka jingïaseng por 10:30 mynstep la sam ïa ka ktien u Blei da u Pastor KB Snaitang.
Ha ka jingïaseng paidbah ha ka por 1:30 nohphai sngi ha shwa ban sam ïa ka ktien u Blei, u Pastor GPL Gadew u la kren ïa ka jinglongkyrpang ka jaidbynriew Khasi kaba dei ka kolshor.
U la ong haba u ïoh ïa ka bynta ban sam ïa ka ktien jong u Blei sha kane ka Jingïaseng Synod ha Laitryngew, u la pynkynmaw haba ki phareng ki buh ïa ka jaka treikam (headquarter) ha Sohra haba ki mut ban ïaid da ki kulai na Kamrup sha Sylhet ki hap ban pan jingbit na u Syiem ka Hima Nongkhlaw.
U la ong biang haba ki poi sha ka dorbar jong ka Hima Nongkhlaw ki la iphylla haba kane ka dorbar ki la ïatai ban ïatrei ïa ka mat kaba dei haba pan jingbit ban shna lynti ban ïaid na Hima Nongkhlaw.
“Ha kito ki por ka la don ka jingpyrshang ban kren da ka ktien Bengalee hynrei ki Khasi kim pdiang namar ki kwah ban don la ka jong ka ktien, ban don la ka jong ka riti dustur la ka jong” u la ong.
U la ai khublei ïa ki kynthei namar ki dang pynneh ïa ka kolshor namar la pynithuh ïa ka jaidbynriew Khasi da kaba sem dhara namar ki shynrang mynta ki la long sahep lut namar ki la phong da ki sut.
Kumta u la kyntu ïa ki longkmie lada ki leit sha jaka treikam ki dei ban sem haba ki don ha ri lajong bad ki dei ban sem lada ki poi sha Parliament ruh.
Haba sam ïa ka ktien u Blei, u Pastor Gadew u la sot na ka Kitab u Nehemaïa ka lynnong kaba 1 bad ka dkhot kaba 5-11.
