Shillong, Lber 10
Ka Coordination Committee jong ki tnat treikam ka Sorkar Jylla ha ryngkat ki bor district na ki ar tylli ki district kin ïakynduh mynta ka taïew na ka bynta ban shim rai haba ïadei bad ka jingrah ïa ka jingkieng ha Pung Umïam shalor na ka bynta ban bujli ïa ki ‘bearing’ bad ban khang ruh ki kali ha ka por rah ïa ka jingkieng shalor bad ha ka sngi ba pynhap biang ïa ka jingkieng ynda la dep ban thep da ki ‘bearing kiba thymmai.
Haba ïakren bad u Myntri ka tnat bording u AT Mondal u la ong ba ha shwa ban ïakynduh ka Coordination Committee kan don ruh ka jingïakren hapdeng ka tnat bording bad Meghalaya Energy Corporation Limited (MeECL)
U la ong ba ha kane ka taïew kan don ka jingïakynduh jong ka Coordination Committee halor ka jingkhang ïa ka jingkieng ha Pung Umïam na ka bynta ban rah ïa ka bynta jong ka jingkieng shalor bad ban shim ki lad ki lynti ha ka por ba pyntrei ïa ki kam.
Ka Coordination Committee ka kynthup ïa ka tnat Bording, MeECL, PWD, Home (Police), Transport nalor ki bor district na Ri-Bhoi bad East Khasi Hills.
Ka jingkhang ïa ki kali ban ïaid ka dei ha ka por ba rah ïa ka jingkieng shalor bad ha ka por ba dei ban pynshong biang ha kajuh ka jaka ynda la dep ban thep ïa ki bearing kiba thymmai.
La ong ba kane ka kam ka lah ban long ha shiteng jong mynta u bnai kata tang hadien ba la dep ban khmih lut ïa ki jingdonkam baroh.
Ynda la khang ïa ka jingkieng ha Pung Umïam ki kali rit ki hap pyndonkam ïa ka surok Umroi-Mawlai lyngba ka shnong Umrynjah lane ka surok Madan Nonglakhiat-Mawsiatkhnam ban wan Shillong ne haba leit na Shillong sha Guwahati bad Ri Bhoi.
Ki kali heh kin hap ïaid na Shillong Bypass bad rung lyngba ka Diengpasoh ban poi sha Shillong lane leit swait naduh Mawryngkneng.
Nalor ka jingthep bearing thymmai ha kane ka jingkieng, ka jingmaramot ïa ka jaka ba den ïa ka pung Umïam ruh ka dang ïaid shakhmat ha kaba la ksam ïa ki thliew ban theh dewbilat thymmai khnang ban pynskhem ïa kane ka jingtei kaba den ïa ka um.
Kane ka projek pynmih bording ka la donkam ban maramot biang namar ka jingtei ban den ïa ka pung Umïam ka la ïaid mynta kumba 64 snem ei ei namar ha ki snem kiba mynshwa ki kali kiba ïaid ki dang duna bad ki kali kiba kit jingkit bakhia ruh ki dang duna khamtam ki trok kiba don bun tylli ki shaka.
Mynshwa ki trok ki lah ban kit tang khyndiat ton hynrei mynta ki don ki trok kiba don palat 12 tylli ki shaka kiba kham khia bad kham lah ruh ban kit kham bun ki jingkit kaba buh jingma pynban ïa ka jaka ba den ïa ka pung Umïam.
