Mawkyrwat, Lber 10
Ka Trinamool Congress, Mawkyrwat Block ha ka Sngi Saitjaiñ ka la lum ïa ka jingïalang ba kyrkieh jong ki nongïalam na ki Unit bad Sub- Unit bapher-bapher jong ka TMC Mawkyrwat Block ban ïamir jingmut halor ka ilekshon MP ka ban sa long shen.
Ha kane ka jingïalang la ïadonlang u Bah Sounder S. Cajee, President TMC Mawkyrwat Block ha ryngkat spah ngut ki nongïalam bad nongkyrshan ki la poi sha ka jingïalang ba la pynlong ha shlem treikam ka TMC ha Mawkyrwat.
U Bah Sounder Cajee haba kren bad ki lad pathai khubor hadien ba la wai ka jingïalang u la ïathuh ba namar ba ka TMC kam pynïeng kyrtong ha kane ilekshon MP bad hadien ba ki la ïatai sani bha bad ki nongïalam da kawei ka sur ki la shim ïa ka rai ban ai laitluid ha ki nongkyrshan ba kin thep katba mon ïa ki ‘vote’ ki jong ki.
U la ïathuh ruh ba ha kane ka jingïalang bun ki nongïalam ki la pynpaw ba ki kham mon ïa ka VPP bad ïa ka Congress ha kaba ki la pynpaw ruh ba kim sngewmyntoi ban leit sha kiwei-kiwei ki seng namar ha kaba kut kin sa leit pynïasoh bad ka BJP namar kumba long mynta kine ki ar tylli ki seng kumba long ka TMC, kim don jingïadei eiei bad ka BJP.
Ha kane ka jingïalang, u Bah Sounder Cajee u la kyntu ruh ïa ki nongkyrshan ba kin leh ïa kaba donkam ban leit sha kino-kino ki seng tangba kim dei pat ban thep ïa ka NPP.
Ym dei ba u pyrshah ïa ka NPP ne ïa u Conrad Sangma hynrei ka jingpyrshah jong u ka long halor ki mat kiba kane ka seng ka la leh.
U la pynkynmaw ruh ba ha ka por ba ka Jylla ka dang ïakhih ïa ka CAA ha kaba u Conrad Sangma bad ka kynhun jong u ki la pyrshah, hynrei ha ka sngi ynda la ïeng ha Parliament, ka MP jong ka NPP napoh Tura, ka Agatha Sangma ka la ïeng ban kyrshan ïa ka CAA pyrshah ïa ka rai jong u paidbah kaba ki samla, ki sengbhalang ki ïakhih bad pyrshah jur ha kito ki por.
“Ngam pyrshah ïa ka kyrtong ne ïa kiei-kiei, hynrei nga kren halor ki mat kiba dei na bynta ka Ri bad Jaidbynriew. Haba u paidbah paidlang u khih, balei keiñ phim sngap,” u la ong.
U la ong ruh ba lada ki ïoh biang sa uwei u MP napoh Shillong, ka mut la poi sha ka jingeh kaba khraw namar ka BJP kan sa pyntreikam beit ïa ka CAA.
Haba kylli pat ïa u Bah Sounder hato un dang ïakhun ne em ïa ka MDC ilekshon napoh Mawkyrwat, u Bah Sounder u la ïathuh ba ka kynhun jong u kan ïakhun beit ïa ka MDC ilekshon la un ïakhun ma u ne ailad ïa kiwei, hynrei kiei-kiei baroh kin sa shai bha hadien ka ilekshon MP.
