Agartala, Lber:
U Biplab Kumar Deb, uba long mynta u MP jong ka Rajya Sabha bad u kyrtong ban ïakhun na West Tripura Lok Sabha konstitwensi, u la pynpaw da kaba ong ba ha ka miet jong ka 8 tarik, Lber ba ka Parliamentary Board jong ka seng BJP ka la thmu ban lum lang ha kaba ïadei bad ka rai ban jied ïa u kyrtong jong ka seng ban ïakhun na East Tripura Lok Sabha konstitwensi.
Hadien ba la dep ban pynlong ïa ka jingïalang bad u nongseng jong ka TIPRA u Pradyot Debbarman, u Deb u la ong ba ka jingïakren jong ka kynhun ba dei khmih halor kane kan sa long shen.
U la ïai ban da kaba ong ba ka mat ba kongsan ba la buh da ka seng BJP ka dang sah kum ka bynta ban khmih bniah ha kaba ïadei bad ka jingthmu pyntreikam ka ban wanrah ïa ka jingkyntiew ïa ki kam jong ka seng khamtam ha kaba ïadei bad ka ilekshon ka ban long ha ki bnai ban wan .
Kum shi bynta ban jubab halor ki jingkylli ba la buh halor ka East Tripura konstitwensi, u Deb u la pyntikna da kaba ong ba ka seng BJP kan sa pynbna shen ïa u kyrtong jong ka.
U la ong ba ka Parliamentary Board kan sa lumlang halor kane ynda u Myntri Rangbahduh u Narendra Modi u la pynlong ïa ka jingïalang.
