Nongstoiñ, Lber:
Ka jingnang kiew jong ki kam pynïap ha ki bynta jong ka sor Nongstoiñ mynta ka la sdang ban kynrei bad kane ka la pynmih ruh u dak jingkylli hapdeng ba bun ba lang.
Ka jingshah pynïap ha kine khyndiat sngi kaba la jia ïa u samla Mcbornbonneyson Kharbani ha ki ‘riew thrang snam ki bym don shuh ïa ka jingïatiplem para briew ka la nang pynlong shuh shuh lehse ka jingsyier wat ïa ka ïaid ka ïeng.
U President ka West Khasi Student Union (WKSU) Sengkmie Bah D Sun haba kren halor kane ka phang, u la ong ba ha kaba ïadei bad ka jingpur stet ki kam sniew ki kam pynïap kiba har rukom ha sor Nongstoiñ kan sa shong pyrkhat kumno ban teh lakam ïa kine ki jingsniew. Ka seng ka kyntu ïa ki bor hima, ki bor shnong, ki bor sorkar ban kyndit thiah noh bad ban shim khia ha shuwa ba ki kam sniew kam bymman kin wan jia khala-khala ha man ki thliew ïing.
U la ong ba ka WKSU ka pynrem jur ïa kino-kino kiba donkti ban shim noh ïa ka mynsiem ba kordor jong u samla Mcbornbonneyson.
Ha kajuh ka por, u la ong ruh ba ka WKSU ka ai jingkyrshan ïa ka kur Kharbani na ka bynta ki sienjam kiba tyngeh ban ujor pyrshah ïa ki ‘riew thrang snam ‘riew bymman kiba la pyndkut noh ïa ka jingim jong utei u samla uba dei na ka kur ka jait Kharbani.
“Ka seng ka phah ka khubor sngewlem sha ki bahaïing bahasem, ki kur ki jait, ki kha ki man jong u samla Mcbornbonneyson Kharbani uba la khlad noh, bad ai ka mynsiem jong u kan shong jahthait ha ka jingsuk,” ong u Bah Sun.
U la ong ruh ba ka seng ka dawa na ki bor jong ka aiñ khamtam ïa ka tnat pulit ba kan shimkhia ïa ki jingujor jong ka kur Kharbani halor kitei ki jingjia bad ai ba ki aiñ ki kanun kin ai ïa ka hok sha katei ka longïing.
Nangta, u la ong ruh ba ka seng ka dawa ruh ba dei ban pynshitom jur ïa kito kiba donkti ha katei ka kam pynïap briew bad ruh ym dei ban pyllait jamin da kaba suk ïa ki ‘riew pyntriem ha ka imlang sahlang ha ka thaiñ West Khasi Hills khamtam ha sor Nongstoiñ.
