Shillong, Lber 10
U Myntri Rangbah barim ka Jylla bad nongïalam ka TMC, u Dr. Mukul Sangma ha ka Sngi U Blei u la ther tyngeh ïa ka Congress halor ka jingpynbna kyrtong ha ki 2 tylli ki konstitwensi hapoh ka Jylla na bynta ka ilekshon ban wan sha ka Lok Sabha.
U Dr. Sangma u la kynthoh ruh halor ka jingkren u nongïalam ka Congress, u Jairam Ramesh ba ka TMC kam shym la ap bad ïaid shakhmat ban pynbna ïa ki kyrtong ha baroh 42 tylli ki konstitwensi haba phai sha West Bengal.
“Ngi la ap la slem bad nga sngew ba kiwei ki lah ban ïohi, ka ri baroh kawei ka la peit ïa ngi bad ïai ap. Ka la don ka jingthmu lang ban don ïa uwei/kawei u/ka kyrtong na ka ‘INDIA Bloc’ ban pyntikna ba ngi ïatylli lang mlon kawei ban pyni ïa ka jingkhlaiñ jong ngi, hynrei kane kam shym la urlong,” u la ong.
Utei u nongïalam u la pynsngew ruh ba lada ka Congress mynta ka ong ba ka TMC kam shym la ap bad ïaid shakhmat ban pynbna kyrtong ha baroh 42 tylli ki konstitwensi ha West Bengal, kata ka dei ban kynmaw ba ka Congress kam tip eiei ïa ka jinglong-jingman kaba jia.
Ha kajuh ka por haba kdew ba ka Congress ka la kynriah pura na ka jinglong-jingman jong ka jingshisha, u la ong, “Hato kam dei ka jingshisha ba ki la ïaid shakhmat bad pynbna ïa ki kyrtong haba ïadei bad ka Meghalaya. Ha Meghalaya ki don 2 tylli ki konstitwensi bad na kine, ka Congress ka la ïaid shakhmat bad pynbna ïa ki kyrtong.”
