Shillong, Lber 10
Ki pulit ka East Khasi Hills ha ka Sngi U Blei ki la tyrwa da ka buskit kaba T. 1 lak sha kino-kino ki nongshong shnong kiba wan shakhmat ban ai ïa ka jingtip kaba thikna halor kito kiba donkti ha ka jingpynbthei bom ha Them Ïew Mawlong ha ka miet Sngi Saitjaiñ.
Ha u kyrwoh khubor, u Superintendent of Police (SP) ka East Khasi Hills, u Rituraj Ravi, u la ong ba hynnin ka miet ha ka por kumba 10:30, uwei u bom IED u la bthei ha kawei ka jaka ba la shu ker da ki tin bad ka bym shong bym sah briew. Kane ka jaka ka don ha Syndicate Bus Stand, Them Metor ha Ïew Mawlong. U la ong ba ïa u bom IED la buh ha kawei ka kynja tin, bad la suba ba ka jingbthei ka dei na ki Gelatin Stick. Hadien ka jingbthei, ka jaka ba la ker da ka tin ka la julor bad ki don ki ïit jong ki ïing ba marjan kiba la pait.
U SP u la ong ruh ba ïa katei ka jingjia la kheiñ kum ka kam pyntriem bad ka jingpynsaja ka long katkum ki kyndon jong ka Unlawful Activities (Prevention) Act bad Explosive Substances Act, bad kito kiba la donkti ki la leh ïa ka kam pyntriem bad ka ïasyriem bad ka jingïakhun pyrshah ïa ka Ri.
Namarkata, u la ong ba kino-kino kiba lah ban ai ïa ki jingtip ba thikna ka ban ïalam sha ka jingïohkem ïa kiba donkti kin ïoh ïa ka buskit da ka pisa kaba T.1 lak. U la ong ruh ba yn buhrieh ïa ka kyrteng jong ki nongwan ai jingtip. Kino-kino kiba don jingtip ki lah ban phah khubor ha u nombor 9366790273 lane lyngba ka email: [email protected].
