Jowai, Lber 10
Ban ïalap ïa ka jingshyrkhei bad jingma jong ka HIV/AIDS, ka Link Worker Scheme, SURE lyngba ka jing-kyrshan jong Meghalaya Aids Control Society (MASC) ryngkat ka Thomas Jones Synod College ki la pynlong ïa ka jingïakob rwai tynrai bad phawar ha Hall jong ka Thomas Jones Synod College, Jowai ha ka 9 tarik Lber. Ha kane ka sngi, la don lang ka Kong D.V. Lyngdoh, Additional Deputy Commissioner, West Jaiñtia Hills District kum ka kongsan, ka District Medical & Health Officer, West Jaiñtia Hills District, Dr. Evalyneda B.V. Laloo, u Principal ka Thomas Jones Synod College, Dr. D.G. Lyngdoh, ki nonghikai bad kiwei.
Ka kongsan Kong D.V. Lyngdoh ka la ong ka jingpynlong ïa kiba kum kine ki prokram pynsaphriang jingtip ka long kaba donkam shibun namar ki paidbah ki ïoh jingshai bad nalor ki jingshai ba ki ïoh, ki lah pat ban ïada ïalade na kane ka jait jingpang. Ka la ban jur halor ka jingdonkam ban ïoh ïa ka jingkoit jingkhiah namar ka pynkiew ïa ka shnong ka thaw, ka ri bad ka jaidbynriew.
U Bah S. Tariang CPM, (DISHA) haba batai shaphang u khñiang HIV, u la ïathuh ba la lap nyngkong hapoh ri India ïa une u khñiang jingpang dei ha u snem 1986 ha Chennai jong ka jylla Tamil Nadu. Naduh kitei ki snem kane ka jingpang ka la sar ïa ka jingim jong ki briew khlem sangeh haduh kine ki sngi.
Ha kaba ïadei bad u khñiang HIV hapoh ka Jylla, u Bah Tariang u la ong ba kumba long mynta, ka Jylla ka wan ha ka kyrdan kaba saw napdeng ki Jylla ka Thaiñ Shatei Lam Mihngi bad katkum ka jinglum jingtip, ki briew kiba im bad u khñiang HIV kim duna shuh ïa ka 8000 ngut shaneng.
Hapdeng ki distrik kiba don hapoh ka Jylla, u la ong ba ka Ri-lum Jaiñtia kynthup ka East bad West Jaiñtia ka long kaba hakhmat ha ka jingdon jong ki briew kiba ïoh ïa une u khñiang jingpang HIV bad katkum ka jinglum jingtip jong u snem 2022-2023, ki briew kiba im bad u khñiang HIV ki don palat 4000 ngut.
Kiwei-kiwei kiba la ai jingkren ki long u Bah W. Dohling, D.D. Prevention MACS, u Dr. H.H. Mohrmen, Secretary SURE, ka Kong B. Lamar, Zonal Supervisor nalor kiwei-kiwei.
Ha kane ka jingïakob rwai la shim bynta da 10 tylli ki kynhun kiba la rwai shaphang ka jingïada bad jingsaphriang u khñiang HIV/Aids. Ka kynhun rwai kaba rah ïa ka nam jop ka dei ka Maximillia Chullai & Patner kaba la ïoh ïa ka song pisa kaba T. 15,000, katba ka kyrdan ba-ar ka la leit sha Ki Mookhuri kaba la ïoh ïa ka song pisa kaba T. 8,000 bad ka Lai Luminary Liam (Solo) ka la wan ba-lai ha ryngkat T. 5,000.
