Shillong, Lber 10
Ka jingpynkhreh ka la don lypa ha kine ki bnai ban wan lada donkam ban pyntreikam ïa ka jingpynlip bording ilektrik ha ka Jylla ha kaba yn kham pynduna ïa ki kynta ban pynlip ïa ka bording ilektrik ha ka shisngi.
Ka jingpynkhreh na ka liang ka tnat bording bad ka Meghalaya Energy Corporation Limited (MeECL) ka la don lypa kumno ban shim ïa ki sienjam ha kane ka sien kaba mynta lada hap ban pyntreikam ïa ka jingpynlip bording ilektrik khamtam lada ka aïom slap ka shimpor kumba ka jia ha u snem ba la dep.
“Ngi kyrmen ïa kaba bha bad ngi ngeit ba kan sa don ka jinghap slap kloi mynta u snem khnang ba ka jingpynmih ïa ka bording ilektrik ruh kan nym ktah than,” la ong u Myntri ka tnat bording u AT Mondal.
U la ong ba ha u snem ba la dep, ka jingïoh slap khamtam ha East Khasi Hills district ka la slem bha ha kaba ka jingdon ka um ha Pung Umïam ruh ka la hiar shaba palat bad ktah ïa ka jingpynmih bording.
Ka aïom pyrem kaba ju tip ruh kum ka aïom tyrkhong ka la sdang mynta u bnai Lber bad kan kut haduh u Ïaïong.
Lada kloi ban hap slap ha u Lber ne Ïaïong ki jaka pynmih bording ha Jylla ruh kin nym kyrduh um than. Hynrei lada ym hap slap kham kloi, kan ktah bha ïa ka jingpynmih bording ilektrik.
U la ong ba ha u snem ba la dep, ka jingpynlip bording ilektrik ka la neh bun kynta ha ka shisngi, hynrei mynta u snem ka la don lypa ka jingpynkhreh kumno ban pynduna ïa ka por pynlip bording khnang ba kan nym ktah than ïa ki nongpyndonkam ïa ka bording ha ka Jylla la ka dei ha ki jaka sor ne nongkyndong.
“Lada ngim ïoh slap kham kloi, ka um ha ki jaka pynmih bording kan kham duna, bad hap ban pyntreikam ïa ka jingpynlip bording tangba kam dei ban long than bun kynta. Kumta ngi la don lypa ka jingpynkhreh kumno ban leh ïa kane,” la bynrap u Mondal.
