New Delhi, Lber:
Ki kynhun synrop ba pyrshah kiba la pynkhreh na ka bynta ka jingïakhun ïa ka ilekshon Lok Sabha ki dang ïakhun mynta ban poi sha ka bynta jong ka jingïa-sngewthuh jingmut halor ka jingïasam ïa 48 tylli ki konstitwensi.
Kumba la ïoh jingtip, la ong ba ka seng BJP ka la ïakren bad ki seng ba la ïatreilang kum ka Shiv Sena bad ka Nationalist Congress Party ha kaba la ong ba kan kham pynsuk lada ïakhun kham bun ki konstitwensi ka ban long da kumba 34-35 tylli na ka bynta ban jop kham bun ha ki konstitwensi na ki 48 tylli kumba la buh thong.
Ka la ong ba u Myntri ka sorkar kmie uba dei khmih ïa ka tnat ki kam pohïing u Amit Shah u la pynpaw ba kane ka jingthmu kan sa wanrah ïa ka jingjop ha ka por ba u la leit jngoh ïa ka jylla Maharashtra da ar sngi, kata ha ka sngi Ba-ar bad ka sngi Balang jong ka taïew ba la lah. Ha kawei pat ka bynta, ka Maha Vikas Aghadi (MVA), kaba la trei na ka bynta ban pynïaid ïa ka jingtreikam jong ka kynhun synrop ka liang pyrshah da kaba ïarap bad kyrshan ïa u Prakash Ambedkar jong ka Vanchit Bahujan Aghadi, kam shym la ai rai ha kaba ïadei bad kane ka bynta.
Ha ka jingleit jngoh kaba ar sngi sha Maharashtra, u Shah u la ïakren sani bha bad u Myntri Rangbah ka jylla u Eknath Shinde bad ki Symbud Myntri Rangbah kiba kynthup ïa u Ajit Pawar bad u Devendra Fadnavis ha ka miet jong ka sngi Ba-ar. U Shah u la don kumba katto katne ki bynta bakongsan ban ïakren bad ban ïasamlem bad ki lai ngut ki nongïalam ki ban sa don ka bynta ban kitkhlieh ïa ka kynhun ban khmih bniah na ka bynta ki 48 tylli ki konstitwensi.
