New Delhi, Lber:
Ïa ka jingthung ïa arngut ki Election Commissioner da ka sorkar kumba la khmih lynti ba kan sa long ha kine ki khyndiat sngi ban sa wan, la shah pyrshah hapoh ka Supreme Court. Ka nongïalam jong ka seng Congress na Madhya Pradesh ka la buh jingmudui ha kaba la ong ba la dei ban pynsangeh shwa ha kaba ïadei bad ka jingthung ïa ki Election Commissioners da ka sorkar.
Kine ki Post jong ki Election Commissioner ki la sah thylli hadien ka jingiehnohkam ba dang shen jong u Arun Goel bad kawei pat hadien ka jingshongthait noh jong u Anup Chandra Pandey ha u bnai ba la dep. Ka Election Commission of India mynta ka la don sa tang u Chief Election Commissioner Rajiv Kumar.
Ka Committee kaba don ïa ka bor kaba hakhliehduh ka la thmu ban buh ïa ka jingïalang ha ka 15 tarik, Lber, la ïathuh ka tyllong khubor. Ha ka jingmudui ba la phah, ka nongïalam jong ka Congress ka Jaya Thakur ka la ong ba ka hukum kaba long ha u snem 2023 jong ka Constitution Bench ka la ong ba ïa ki Election Commissioner la dei ban thung ha ryngkat ka jingai jingmut jong ka kynhun kaba kynthup ïa u Myntri Rangbahduh, u nongïalam ka liang pyrshah bad u Chief Justice of India.
Ïa ki Election Commissioner ha India la ju thung da u ne ka President ryngkat ka jingmynjurlang jong lai ngut ki dkhot ka kynhun hapoh ka jingpynïaid jong u Myntri Rangbahduh. Ka Thakur ka la pan ruh ka jingtuklar na ka Supreme Court na ka bynta ban thung ïa ki Election Commissioner ha kaba ïadei bad ka rai jong u snem 2023.
